ZCD WEEK IN BRIEF: Wednesday to Wednesday, June 12-19, 2013

Sunday, June 23, 2013 [Kap Khan Khual]

Political Development::

Wednesday, June 12, 2013, Heilei:

Yangon (ZCD.Info): June 6 ni-in Ngennung thugenna pen Pu Khual Suan Thang inn ah khuami 

30 kimbang nasep kin mah mah hang hongpai uhi.ZCD party honglut 50 valbang phapahin  vaipuak lading khat kiseh pah hi. Ngennung vaivan khitciang, June 12 ni-in Heilei ah ZCD  policy 4 (Ngimna) te thungai ding a hongpai khuami 200 valtungah annneek ma (Innteek te’n 

sial khat go) pulaakna kinei theih hi. A nitakciang zong khuami 40 valtawh thukupna kinei theih 

lai hi. 

Thursday, 13, 2013, Heilei:

Yangon (ZCD.Info): June 13 ni’zingsang in Pu Kap Khan Thang inn ah signboard suangin committee member 9 tawh ZCD ma’pangding kiseh theih hi. Zing annneek khitciang, Paakzang lam’zuan in GREAT a-ki-ci NGO khatin hunna bawl a, tua munah zong thugen ding ZCD hun hongpia hi. A kician mah mah khuami 60 tung ZCD policies kigentheih in thuvan ding khat kiseh theih pah hi.

Sunday, 16, 2013, Lamzang:

Yangon (ZCD.Info): Lamzang, Pu Neng Lam Za Thang inn (Lamzang Mualtung Innpi) ah thugenna kinei-in khangno sinsen 80 thungai hongpai hi. Pu Neng Lam Thang pen Pu Thual Zen te’ galkap khat hi-in Mongyua Thong ah kum 3 sung thongkia ngei hi.

Tuesday, 18, 2013, Yangon:

Yangon (ZCD.Info): UNA makaipite Daw Aung San Suu Kyi innah politics kikupna nei hi. 2008  constitution, legal system puahphat ding vai leh PR system deihloh vai kikum theih hi. UNA  tawh holimna neih zel zel ding thukimna nei hi. ZCD pan Pu Chin Sian Thang, President, Pu 

Zam Za Mung, Secretary leh Pu Eng Biak Thang te kihel theih hi.

Wednesday, 19, 2013, Yangon:

Yangon (ZCD.info): Park Royal Hotel ah International Republican Institute (IRI) i President leh Ambassador te’n Panel Discussion bawlin political parties 16, civil society organizations 24 pan makai 80 bang thun gai ding pai-in ZCD pan Pu Chin Sian Thang,  Pu Zam Za Mung, Pu Khup Mung,  Pu Ngul Khan Dal leh Pu Eng Biak Thang te zong kihel theih hi.

See More...

ZCD te International Republican Institute pawi ah kihel

International Republican Institute te sap na tawh 20 June 2013 in, Park Royal zingsang 10 in kawlgam sung a party tuam tuam te leh civil society te pan mipi 100 bang ong sam in a mau na sep dan ong gen khia thei uh a, ZCD party pan in Pu Chin Sian Thang (President), Pu Ngul Khan Dal, Pu Khup Mung leh Pu Zam Mung te ki hel thei uh hi.

Tu ciang ciang ah kua kua in ong sam leh ka hih theih bang bang un na pai den ung.IRI pan in President,Asia Regional Director leh Country Director te ong ki hel thei uh hi. President pan a gen na ah ko US gam ah zong a tam zaw deih na tawh US President ka tel uh hang in mi gi na lo zong ki tel kha thei ve ve hi. 

Democracy ki uk na kum240 bang ka zat khit uh hang hak na ,deih bang loh na te ki phul kha ve ve hi ci hi.Tua ciang a pai te lam pan bel PR ki tel dan deih loh na leh Ferderal deih na thu ki lim gen pih mah mah hi.

Zam Mung

ZCD

See More...

Malaysia ah Zomi numei conference

ZCD (Mlys) in Zomi Numei Conference abawl ni leh Pate' Ni kituak lian himah tase leh hong kihel dinga sapte leh thugen dinga sehte kim takin hong pai thei uh hi. Geelsa om bangin  Chairman Pa Thang Khen Lian in hun hong len pah hi. Hunpat thugnetna pen 10:30am hun in ZWO pan Nu Khual Ngaih Ning in hong nei a, tua khit ciangin mimal kipulakna in zomto pah hi. Pa Phillip Khaipu in vaimuakna thu a genna ah " Zomi numeite in Zomi vai atheih uh a hun hita a, minam ading nasepna ah pasalte tawh khut kilen a kalsuan khop theih kisam ta hi. Gamvai nasepna ah numeite in bang mun panin pan la thei ding hiam cih kikum dinga  a kikaikhawm hihang.." ciin tom kim takin pulaakna hong nei hi.

Azom ah ZAM President Sya Hau Khai in hibangin thugenna hong nei hi: Numei tawh kisai nasepna pen Zomi sungah muh ding om nai lo ahihman in dah huai ka sa hi. Numeite pen panpih theih bangin panpih ni , bang hang hiam cileh khutme nga lakah khat kim kei leh na asep theihdan kilamdang pah hi. Khutme tengin septheih tuam tek nei uh a, pang khawm a na hong sep uh ciangin thahat zo pan hi. Malaysia ah Zomi tul sawmthum val bang om napi tul sawmnih kiim khawng bek ZAM (Zomi  kipawlna) ah hong lut uh hi. Zomi teng khempeuh numei pasal in khauhual khat ih bat theih kisam penpen ta hi. Innkuan sungah numeite a thupit mah bangin kipawlnate ah zong numeite nong thahat ding uleh nakpi taka na nong sep ding uh lunggulhna lianpi kinei hi. Malaysia ah zong Zomi numei kipawlna a om lo hi lo hi. Vai tuamtuam hang tawh hong thanem kik uh hikei leh nidangin numei kipawlna pen thahat mahmah ngei hi. Tu in ZAM ah zong numei kinei ta ahihman in numei kipawlna nong thaksuah sak kik ding uleh hoih tak a na i sep khop theih ding pen nakpi takin kilunggulh hi. (Tomkaihna)

Tua khit ciangin  Philip Khaipu in thugenna hong nei leuleu hi:  Gam leh minam, ngeina lehbiakna, innkuansung dinmun a kilangsak leh a pholak pen numeite ahi uh hi. Migam milei ah khualzin lehang nadangte khempeuh sangin numeite gamtat luhekzia leh kizep kipuahdan in mit la masa in gen masak pen in kinei hi. Mi inn ah hawh lehang pasalte a nuam mahmah phial zongin numeite hong nuam kei mawk uleh ki tutkho thei lo hi.Hih munte ah numeite mawhpuakna lian mahmah hi.Numeite pilna lamah pattah huai uh hi, bang hang hiam cileh numeite in inn kuansung, usung nausung ah hamphatna (direct impact) pia hi, na lawmnu laitan nei khat hong himawk leh sum tampi beiin na tate midang kiangah Tution na kahsak kul lo cihna hipah hi. Numei pilten tate pattahdan zong siam in minam leh ngeina itna zong tate lungsim sungah khaici bangin tuh in picingto sak thei uh hi.Gam khangtote ah numei pasal liangko kikimna thupisak ta uh hi. Hih thu pen telkhialh loh ding thupi hi. Liangko kikim cihciangin na khempeuh a kibangin sem khawm ding cihna hikhin lo a, kihuh theihna munte ah kihuh ding cihna hizaw hi. Zomi sungah nidang a ih kalsuanzia pen ( Mawto engine bang hileh) 4x2 tawh kikalsuan ahihman in namdangte nungah ki om den hi. Hihpen bang hang hiding hiam cih ih kankan ciangin pasalte nungpan hong tawsawn ding numeite pen Zomite'n ih nuaisiah denna hang hi gige mawk hi.Tuni a kipan  numei pasal pang khawm in 4x4 tawh mailam nawt ta ni. ( Tomkaihna)

Phillip Khaipu' thugenna khit ciangin Evan. Suangdal in Article hong khak simna kinei a, tuasung panin "Pasalte haina, huaihamna le gongtat zuauphuahna thukim pih lo ding. Eve bangin pasal thu dong lopi in ne lo ding...Ananias le Sapphira zong nih gel kilungtuak kipumpaih uh hi.... Zomi nupite adingin a etteh huai lo numei  thum, Eve bangin pasalte thu dong lo pi-in gamta lo ding. Job zi bangin ih pasalte damloh zawnkhal tuah siatna ah mawhsak lo ding. Lot zi bangin ih nungsang heihei lo ding (Piancilna.  3: 1-7; 19: 26; Job.2: 9). Nupi hoih thum, Ruth bangin a teeknu it ding, Sarrah bangin a pasal lutangin nei a, “topa” a ci ngiat mi, Mary bangin ata a it mahmah mite ahi hi...naupangte pattahna ah na tate a pil ding na deih leh mawk gup ken la,a kihhuai mite leh a zahtakhuai zinte tawh anne khawm sak kenla, mehtui kuangkhat pan sawk khawmsak kei in... Guih theih kham theih a zang hiam encik inla, hi thei leh a gilvah nungah mohphu kisam sak se dah in.. Na ta na mo in nau a paai laitak an lim a nek ding le a thamaan ding iplah pih in. Tha nei lopi-in nau suak leh sum tam bei zaw dinga, nangma’ hamsat lunggimna ding mah hi veve hi. Kikin kei lua lehang “Ak ta duh gawl kilawh khuh” a cih kibang lian hi..." cih thute hoih kisa phadiak in tha kingah kimtek mahmah hi.

Thu kikupna aman khit ciangin Numei kipawlna lampan in Syamah Hau in Zomi numeite dinmun genna hong nei hi. " Khanglui hun lai pek akipan tuni ciang dong Zomi sungah numeite kinenniamna kikhawl bawl thei nai lo hi. Pilna laitan cihte zong unau sanggam lakah pasalte bek kiguan hi. Pasalte sep nop loh teng numeite'n sem in kigim mahmah hi. Nakpi takin gimna nam tuamtuam kithuak mah taleh atam zaw phun lo pau lo in om uh hi.Pasalte'n kingaih laiin hong it mahmah napi nupa suah khit ciang hong don nawn lo uh a, naupai nauhaih laitak a numeite duh theih singgah theipuam cihte hong ngaihsut sak lo uh hi. Pasalte pen kipasal sak lua liang uh ahihman in thuak haksa kisa mahmah hi. Nupa suahma in nau neihzah ding kikhup kholhna lawm kingaite kikal ah om thei leh hoih ding hi. Zatui zaha tawh nau neih ding kidal sangin condom zat hoih zaw hi. Innsung nasepna leh puahzia ah numeite bek mawhpua sak lo in, ahoih zaw athei pasalte'n huh thei uleh hoih a, nupa kihuh a nasem khom theite pen leitung nuntak khat sungah a hampha penpente a hi uh hi....." cih bangin thu hong sung hi.

.....ZCD. InFo

See More...

ZCD /UNA te leh Daw Aung San Suu Kyi ki muh na

June 18,2013  zingsang 10:30 in Daw Aung San Suu Kyi i sap na tawh a ma inn ah UNA pan ZCD,SNLD,MDP leh ALD party te ki muh khop na ki nei thei hi.

Nupinu gen na ah bel Ferderal vai pen dam dam vai hawm ding leh Constitution amendment/reform ding lim gen mah mah hi. Tua khit ciang gullu vai tawh kisai 14/5/2013 a Tedim, Tonzang leh Cikha khua pan a mipi deihna,lung ngulh na lai (kawllai ) tawh pen nupinu khut tung ah na pia ngiat thei ung.

Hih pen kumpi leh Chin state kumpi lam te vai hawm gullu tawh ding pen mipi in ka deih loh na lai hi ci in ki pia hi.

Zam Mung

ZCD

See More...

Zomi Numei Conference, 2013

Zomi Numei tawh kisai  :Syamah Hau (ZWO President)

Zo Ngeina leh Numei      :Dr. Cin Sian Pau (ZOCUS)

Refreshment                    : Avot kiuhkeuh akhum leh etc..

Evaluation/ kikup khopkikna  :Tg. Francis Lamthang (Zomi Quavadis)

Hun Zawh Lungdamkoh Thungetna  :Dr. Cin Sian Pau (ZOCUS)

 16/06/2013 in ZAM Office nuaia Hall sungah Malaysia a om Zomi numei tengpan in saptuam numei gukte leh ZCD(Mlys)te'n kimuh khopna leh thu kikupna kinei hi. Git neih het lohin Pate' Ni tawh hong kituak kha sese ahihman in mi tampi zong kisam ngam lo hi. 

Veina picing tak nei a hong kihel thei Zomi numei gukte tungah  leh hunbawlna sunga thu limci leh thu manpha hong genkhia Dr. Cin Sian Pau (ZOCUS) leh Sya Hau Khai (ZAM President)te tungah gen zawh loh lungdamna lianpi kinei hi.

Zomi Numei Conference Hungeelna

Chairman                         : Pa Lianneu( ZCD)

Kipat Thungetna            :Nu  Ning (Khual Ngaih Ning)

Kipulakna                       :Hong kihel mimal kim tungpa'n

ZCD pa'n Vaimuakna  : Pa Phillip Khaipu (ZCD President, Mlys)

Thugenna                      : Sya Hau Khai (ZAM President)

A Citak leh a Thumaan Numei: Pa Pillip Khaipu (ZCD President, Mlys)

Inn Nupi Panmun        : Evan. Suang Dal' gelh Article simna leh kikup khopna

Lunchbreak                 :Taungzalat Vaimimciim Special leh bawngsa huan khop (a lim mahmah)

Thugenna mankhit ciangin anuai a thulu teng kikupna om leuleu a, Tg. Francis Lamthang (Zomi Quavadis) in hong makaih hi.

1. Puah phat huai Numeite dinmun   2. Teek leh Mo kikal

3. Numeite manphatna                         4. Numei manpha suah theihna ding lampi

5. Mi namdangte tawh kitenna           6. Zomi Parcel

A tunga thulute tawh kisai ngaihsut pulakna te atuam in mail sungah a sawt lo in hong kikhahkhia kik ding hi. ZCD(Mlys) in bang hangin numeite thupisak hiam? A thu damdam in na tel ding hi. Hun leh vai teng khempeuh nuam taka zawh khit ciangin khut kilen in Pasian tungah lungdam kohna kinei khawm hi. Ka kikhen un 4pm hong sat hi. Ih biak  Pasian in minthanna ngah tawntung ta hen. (Zomtoh lai ding..)

zcd.info (Malaysia)

See More...

ZCD nipi khat sung thu (31 May - 05 June 2013)

WEEK IN BRIEF: Saturday to Wednesday, May 31 - June 5, 2013

Monday, June 10, 2013 [ Kap Khan Khual ]

Political/Development Update:

Saturday, May 31, 2013; Cikha

Yangon (ZCD.info): Tuithang ZCD zum hon khit ciang May 31 in Cikha ah organizing committee 9 tawh Pu Pum Khaw Mang inn ah ZCD signboard kisuang zo hi. Tuimui, Haiciin, Tuimang, Suanghoih, Tuikhiang pan palaaite hong pai-in signboard leh ZCD laibu ( Ngimna ) te kipia hi. Zomi minsel ZCD pen ZBCM in nasia takin panpih ding cih zong thukim uhi.

Sunday, June 2 , 2013; Chatrium Hotel, Yangon

Yangon (ZCD.info): United Nationalities Alliance leh Madeleine K. Albright, former Secretary of State of The United State and Chairman of National Democratic Institute (NDI) Board te nai khat leh alang, 10:30 am - 12:00 pm, sung holimna thupi tak in om hi. "National Reconciliation ah bang dong kholh pen? Propositional Representative System (Electoral System) bang ci muh? Religion leh Ethnicity issues a ki bang hiam?" cih te Albright i theihnopna tung tawn in kikum in; Pu Chin Sian Thang, President, ZCD in, " Panglong Agreement galkap kumpin thusim loh hang tuciang dong kilemna om theih nailo hi. National Reconciliation pen tua Panlong Agreement donloh man hi. Kamciam piakte kemlo, thusimlo. Propositional Representative ( PR ) pen ZCD in tulian in sangzolo. Ethnic leh Religion pen a tuam tek hi," ci'n kuppih hi. UNA kipawlna party khat tek pan 2 ta kipai in, ZCD pan Pu Chin Sian Thang, President, ZCD leh Anthony Pu Kap Khan Khual, CEC- Information Section, ZCD te kah hi. Adang ethnic 2010 parties: CPP, CNP, RNDP pan 1 ta bek ki sam in, UNA: SNLD, ALD, KNCD, MDP pan 2 ta kah hi.

Sunday, June 2, 2013;
Royal Rose Restaurant, Yangon

Yangon (ZCD.info): Albright tawh holim khitphetin, Former Political Prisoners vaihawm a vei (6) na ( kum 2013 sung) 2008 constitution workshop ah federalism leh mualtungmite' muhdan thugen ding kipai phei pah hi. Mimal 70 val bang, kipawlna, media, mimal, party tuam tuam pan, pha hi. Thugenpi Pu Chin Sian Thang in constitution puahphatding a tam luat leh athak gelh phat ding hoih zaw a, kum 15 bang sautlo in kha 3 khong in man theih ding in gelh huai hi ci hi. Thugen khit ciang mi 20 val bang dotnate Pu Chin Sian Thang' dongkiknate kilungkim theih mah mah hi.

Wednesday, June 5, 2013; Ngennung

Yangon (ZCD.info): Cikha ZCD zum hong khit ciang, June 5 Wednesday in Ngennung khua Pu Chin inn ah ZCD ngimnate khuamite tungah pulaakna ki nei hi. " Ki lawp theih mah mah in, ZCD laibu zong deih zah in kipiazolo hi," ci'n Pu Pau Lun, Secretary, ZCD in gen hi.

See More...

ZCD in Suangzaang khua ah zum honbeh sawm

10/06/2013 kumin ZCD in Suangzang khua-ah zum hongkik dingin pai

a hi manin buaina om lo a i biak Pasian in hong gual zawh pih na dingin thu nget na-ah hong phawksak un ci kong zotha cial hi...

    ZCD masuan khempeuhah i biak Pasian in hong om pih den ta hen. Amen..

       

thupuak

Tg. Mangpu

Suangzang khua

See More...

Yangon ah Gamvai kamkupna nasia tak in ki nei

2008 pingpei thukhun leh Federal Democracy pen, kizopna kisai na omlo hi

Federal democracy kiukna deih taktak leh mipi aa ding nasem taktak makai ahih leh, 2008 pingpei thukhun laih ding pen ut pelmawh ding hi.
Taw-Win-Hnin-Si (Royal Rose) hallpi ah, tuni 02nd June 2013 in,
Kamkupna nasia tak in ki nei in, Zomi Corngress for Democracy makai Pu Cin Sian Thang in, a tung aa bang in a gen ahihi.

Tua bek thamlo in, mualtung mi te ii muhna ah, Federal pai zia thukhun pi sung ah a om mahsiah pen, Kawlgam ah kilem na om ngei ngei lo ding hi ci in gen lai hi.

Tu laitak aa a kip 2008 thukhun pen, hoihtak in en pha kik le hang, mipi aa ding ngaihsutna om lo in, Kawlgam ki phelkhap lo ding cih bek gen in, koi ci bang in ki phelkhap lo aa kip kho ding cih gen lo hi.

Ki pumkhatna kisia saklo ding cih bek gen in, koi ci bang in ki pumkhat thei ding cih thukhun om saklo hi.

Liangko kikimna, thumaan thutak tak tawh kalsuan na, thukhun hoih taktak khat om ding cih te leh Federal ii paizia taktak koi dan cih te, hoih tak in kikupna leh pholaak phat kikna om hi.

Hih bang in a kibawl pen a 5 veina hita in, U Sai Nyunt Lwin, U Khin Muang Sheang cih te leh (mipi/ party) kipawlna taumtuam tampi, gamvai nasem tampi te bek thamlo in, laigelh siam minthang tampi te, thukhen mang sitni te leh, gamvai aa thongkia ngei lui te aa ki pan, a lunglut mi tampi kimuh khopna ahihi.

See More...

Zomi Congress for Democracy in zum hong beh

                                                                  Tungzang, Tuithang, Chin State

                                                                  Tuesday, Wednesday, May 28-29 2013

Thursday, May 30 2013 [ Kap Khan Khual ]

Yangon ( ZCD.info ): Lamzang ZCD zum May 25 in hong khit ciang Tungzang, Tuithang, Cikha ZCD Zum hong ding in ZCD zumpi pan Pu Gin Kam Lian, G.S., ZCD, Pu Pau Lun Min Thang, Secretary, ZCD tegel tawh Tedim zumpi pan Pu Lang Ngaih Khup, G.S., ZCD, Pu Pau Do Lian, EC, ZCD te May 27 in Tedim pan zin khia uh a, Tuithang khua mual ah Zomi-it Tuithang nungak, makai ten dawn theih COLA tawh vaidawn uhi. Tawldam kap pian ciang Tungzang manawh suak in a ni mah in tung uhi.

A nitaak, Monday May 27, mah in thu gen kipan pah hi. Tungzang khuami 300 thungai hong pai hi. Ki lawp theih mah mah hi. Zingsang, Tuesday May 28, ciang Zomi-it teng tawh committee phuan pah in Pu Ngul Za Khup inn ah ZCD signboard ki suang pah hi. Mimal 200 val lutkhat in hong lut pah hi. Member hong lut sung ah NLD tam zaw hi. Inn teek in gamsa lim mah mah tawh zin hong do hi. Zing ann neek khit ciang Tuithang zuan kik uhi.

Nitaak, Wednesday May 29, thugenna pen Tuithang khua laizang lamzikpi ah nai 2 val bang ki nei hi. Khua hun hoih phatloh hang Tuithang khuami hong pai 200 val in thu lim ngaih mah mah uhi. Committee ki phuan zo in, Pu Za Sawm inn ah ZCD signboard ki suang hi. Member hong lut USDP pan tam zaw hi. Inn teek in sa hong gawh hi.

Pu Gin Kam Lian, G.S., ZCD in " Cikha lam zuan ding mortor tung tuang ta ung. Tonzang pan zong hong ki beh lap lai ding. Ki lawp theih mah mah in Cikha zum hong khit ciang zong hong van van suak lai nung e." tu zingsang, Thursday May 30, ZCD.info hong ho hi.

sr.ZCDinfo

Tuithang

Tungzaang

See More...

Pu Thual Zen Leh A Lawmte Pahtawina

                                                  Pu Thual Zen Leh A Lawmte Pahtawina

                                                      Saturday, May 25, 2013, Lamzang, Tedim

Monday, May 27, 2013[Kap Khan Khual]

Yangon(ZCD.info): "Pu Lo Khen in minsial. Pu Thual Zen pahtawina thau lawng 6 ki lawn. Pu Thual Zen phuak late su't, ki lam.  Innteek Lamzang khua pan ZCD leh Pu Chin Sian Thang a phuah la hong sa. Ka laih...khuasikmul bang tho  zia," Zomi Hero Award pawhtawina, Lamzang ah ZCD tang in thugen Pu Gin Kam Lian, G.S., ZCD in," Kalaymyo ZCD, EC 12 te motor 3, ZCD, EC 15, Tedim te motor 1 leh Tongzang ZCD, EC te motor bike 3 tawh kuan suk; Pu Thual Zen inn kong biang pan a tapa in hong dawn.  Zomi Hero Award hong ap kik. ZCD in Zomi Hero Award Pu Thual Zen tapa nihna tung pia kik... tua khit ciang minsial..thau lawn..  la sa..lam, " hong pulaak ciang "Sentimental Value" cih kammal khat hong phawk sak vat hi.

Sociologist, mi zia leh tong kan tel siam, ten leitung ah value 3: used value, exchange value leh sentimental value, bek om hi ci uhi. Used value, zat theih thupi'tna, pen i zat khit ciang man nei nawnlo hi. Gtn., tuihai, tui dawn khit ciang dangtaak kam in tuihai vaipuak man hi. Lungsim hong la val val lo hi. Tua mah bang in, exchange value, kikawm, kikhek theih thupi'tna, zong i zat khit ciang man lel hi. Gnt., sum, dangka, tawh i deih deih ki lei theih hi. I deih sum tawh i khek khit ciang Sum i vai puak man lel hi. Sentimental value, sinlung thuk thupi'tna, a hih leh ki phawk den in, ki gen gen in, ki angtang in, sinlung kai den hi. Gnt., Topa Jesu, Pasian tapa a hih hang leitung mite hon khia ding in mihing suahna hong la hi. Nuntakna ding na hong sem hi. Mipi phattuamna ding a hih leh, tuisik pan lenggahzu hong suak sak hi, mohluum 2 tawh mipi tul 5 bang hong vak hi. A hih hang, a inn ah tua vang  liat bawl theihna te zang lo hi. Mihing ta ding a nuntakna pia khia hi. Gandhi zong India suahtakna ding nuntaakna pia khia hi. A lim, a maan ten athupitna uh hong gen gen hi. A lim, a maan te laidal hi lel hi. Sentimental value in leitung ki khel sak bek hi. Gam leh minam a hoih lam ah ki khel nang sentimental value kisam in ciing ding zong ki sam hi. ZCD in Pu Thual Zen "Zomi Hero Award" pawhtawina a piak laidal khat bek hi. Exchange value in, tam man hello hi. Ki ne theihlo hi. Niangtui haikhat zong leizo lo ding hi. A hih hang, a "Thu" in tangthu hi a, thu gen hi. Ciak ciak lo hi.

May 25, 2013 Pu Thual Zen leh A Lawmte pawhtawina, Lamzang ah, Rev. Nang Lian Kap in minam it a thupitna lim gen in ZCD mah pan pih ding hanthawn hi. Pu Zam Khat Suan, President, ZCD- Chin State in Pu Chin Sian Thang, President, ZCD laikhak sim khia hi. U Myo Zaw Aung, Board of Director, Innovative Academy in " Minam itna thupi. Kum 10 val bang thong kia..a sung ah nuntaakna paikhia.. thupi hi," ci-in hon tomno sung ah genna nei hi. Nitaak ann kuang um khopna thupi tak in neih khit ciang ZCD zum zong thungetna tawh ki hong hi.

See More...

ZCD pan, gamvai kizopzia kamkupna

Joint Workshop: Political Communication

May 23-25, 2013, Tedim

Zomi Congress for Democracy and Innovative Academy

Saturday, 25 May 2013[ Kap Khan Khual ]

Yangon ( ZCD.info ): Party in a policy te mipi tel theih ding in a pulaak ciang akisam ngeina, theihna te tel theih na ding ZCD in Innovative tawh kipawl in “ Political Communication” thulu tawh Tedim ah ni-thum-kupkhopna May 23-25 sung nei hi. Thu kum ding mi 30 gel kholh hang, ki lawp tek in mi 40 bang pha hi. Party mandate tawh Chin Progressive Party, Chin National Party leh National Unity Party te hong kah hi.

ZCD Tedim Political Communication

National League for Democracy leh United Solidarity Development Party pan party mandate ngah loh hang hong ki hel zong om in, khual lam pan mi 17 pha hi. Pu Gin Kam Lian, G.S., ZCD in hun hong thu gen hi. “Ki lawp theih mah mah ei,” Pu Kam Lian in workshop man ciang, “Ni dang hi dan om ngei lo hi ta ven, a om sun te lah khat bek I thu gen hi-in kup kik theih ding lam hong lo.” cih pulaak hi.

ZCD in party deidan cih neilo in, Zogam a mipi’ politics theihna ki behlap na ding nek ngaih hi. Hong pai ding hun manpha te zong I zat siam theih ding ZCD’lunggultna khat hi. Neihsa, lamsa, pilna te suang zawlo in gam leh minam vei na bek bek tawh suahtak na ding leh khantoh na ding kum gilo 24 sung bang Topa leh hong pan pih Zomi-it te vang bek bek mah tawh a ki kal suan hi. Topa thupha leh Zomi-it te vang bek mah tawh ZCD thubulphuh 4 te ma ki pang to to lai ding hi.

ZCD iNFO

See More...

ZCD min tawh Chinna hawh ding

UNA palaite China ah ni 10 sung om dingin, kuankhia ding uh cih kiza hi.

Shan National Leaque For Democracy pan 5, Arakan Leaque for Democracy pan 1, Mon 1, ZCD 1 kihel ding ci hi.

Rakhine makai Pu Aye Tha Aung in " Kawl Letpadaung sumsan khuuk vai, Kachin gunkhawm vai, Rakhine Gas khuuk vaite ka gen ding uh hi" ci hi.

ZCD in zong Gullu vai China kumpi kiangah gen ding maw, genlo ding? cih bel ki thei nailo hi.

NLD te nungdeuh in hawh khin uh a, Irrawaddy Gunkhawm vai na kun uh hi, tu'n UNA te China in sam leuleu hi.

Bildawh huai thu thak khat hi.

Zo Khup

www.zokhup.com

See More...

Pu Thualzen khua, Lamzaang ah

ZCD in May,Jun khua sung in Tedim,Tonzang leh Cikha huam sung khua tuamtuam ah ZCD zum hon na nei koikoi ding cih thu thang ki za hi.

Hong tung ding May 25 ni Lamzang Khua ah ZCD zum honna leh phamsa Zogam asalpha Pu Thual Zen pahtawi na leh Phawkna hun tawh zang khawm ding cih thu thang ki za hi.

ZCD in mainawt lam manawh in,ama ban Zum honna ki pan kik ta ding in 22/5/2013 ni in Zangkong pan ZCD GS Pu leh ZCD CEC Pu Pau Lun Min Thang ten Zogam lamzuan in tunglam tawh ciahto cih thu thang zong ki zakbeh hi.

ZCD in Pu Thaul Zen te Zogam gaalliam ceptehna piak na thu tawh ki sai in,Lamzang khua in ZCD tung ah lungdam ko ankuang um khawpna neih pih ding cih thu thang ki za hi.

ZCD lutangpi Pu Chin Sian Thang zong thupi tak in sapna lai khak uh cih thu thang ki za in,Pu CSThang in zong nasia tak in Zogam a ding mi masa te manphat na te,tu hun Zogam khuahun luan zia leh ZCD maban ding te nasai tak in, gen khiat na nei ding cih thu thang zong ki za hi.

Tuma kha khat lai in Zogam khua tuamtuam Pu Thual Zen te tangthu ki lim gensim a,a manphatna mipi in mu semsem uh a,ZCD pawl tung ah Lamzang khua in lungdam koh ankung um khawpna nei ding cih aki zak ciang,Zogam sung a om khua tuamtuam pan Pu Thual Zen a ngaih leh ZCD thapia nupi leh papi khangno te tu ma ni thum hal pawl in Tedim ah ki sekkhawl in.Tedim khuapi sung aniang tuisai neih khaat in agen na ah a niangtui hoih khawt tuam ingh ci thu thang zong ki za hi.

ZCD Malaysia in,Gam thumna pai ding a ngak Zomi tulza tampi te omna Malaysia ah Zomi te biak piak ki khawpna ah,Zomi te Nampi Namlian khat ihih na leh khangthak Zomi ten Zogam Zomi ading hanciam na neihhuai thu tangko kawikawi nasep neih uh cih zong thuthang ki za hi.

A sik na-sa uh Biak inn ah ki khawm pawlpi mi ten tha ngah leh thapia mahmah in,maban te ah kizom toto dingin Sia te le Pastor ten thu nasia tak in vaikhak cih zong ki za hi.

Thukai khawm

Zosunni pawl

Thu suah khia

Zolandthang

Nashville TN

See More...

ZCD in zum hon beh sawm

May kha 25,ni- in Lamzang khua ah Pu Thual Zen leh a pawl te pah tawina pawi leh ZCD zum honna om ding hi.

May 27-28 in Tuithang, Tungzang khua ah ZCD zum honna ki nei ding hi.

May 30 pan June nipi masa sung in,Cikha, Tuimui, Tuimang, Haiciin khua te ah ZCD zum honna ki nei ding hi.

Khua hun en in,Tedim gam khua tuamtuam ah zongi pai ding ki sawm hi, Kaptel, Laitui,Suangzang, Heilei kuam teng leh Mualbem khua te ah ZCD policy ki gen kawikawi ding hi.Central pan Pu Chin Sian Thang,Pu Pau Lun Min Thang leh PuGin Kam Lian te makai ding uhhi.

Sen gam Beijing khua pi ah UNA pawl te Sen kumpi te sapna tawh pai ding uh a,ZCD pan Pu Zam Za Mung June, nipi masa sung in pai ding a,ni sawm sawt ding hi.( SNLD, ALD, MDP, ZCD )party 4,ki hel ding )

ZCD iNFO

See More...

Laipian pawlpi leh ZCD

13th May 2013: Minam abawl Pasian hi a, Ngeina leh Biakna abawl zong Pasian a hihi. Tua hia, ZCD-LA in zong Zo ngeina tawh kilam ahi Laipian Pau Cin Hau Pawlpi pen cikmah hunin pampaih thei lo a, zong pampaih ngeilo ding hi.

Leitungbup in Nute' ni bawl in nu pahtawina a piak lai tak in ZCD-LA Malaysia inzong Thupha dawh dingin Laipian Pau Cin Hau Pawlpi Sunway Mentari Court ah vapai in hun nuam tak kizang thei hi. ZCD-LA lampan hita leh Pawlpi lampan hita leh Minam itna thu mah genpi in kinei in la te mahmah zong minam itna la te mah hong sa uh a, a kikhawm mi khempeuh in tha kigah mahmah hi.

Laisang Pu Hauthang in Gam makaite pen minam Nu le Pa hi ci'n nasia tak in tha piak ding leh pan pih ding hong gen hi. Zongeina tawh kilam Laipian Pau Cin Hau Pawlpi leh Zotual lai zong minam kepcinna lian mahmah ahihman in kep cing ding leh sin ding a hoihna thu ZCD-LA lam pan in zong kikup pihna kinei hi. Hun tawp ciangin pawlpi upa teng in an lim mahmah tawh hong vak pikpek uh hi. Nitak nai 5 ciang in ka kikhen thei pan uh hi.

ZCD iNFO

See More...

Pu. Cin Sian Thang leh Pi. San Nuam lungdam pihna

* Pasian in leitung piancil laipek pan anapat uh ahihman in, nupa suak cih pen mihingte adingin " Natural " ahihi.

* Hindu minamte pen numei ten pasal kizongin, kilei uhi. Apasal in, akileina go leh gam, neihsa teng abei ciangin ma theilai-a numei lampan bangmah thuneih theihna omlo uhi.

* Ei Zomite pen pasal in numei kizong, kihel, kilei hi. Hihte pen "Culture" ahihi.

* Hih thute ingaih sut ciangin, Ngeina sungpan izuihzawh dingte leh ahoihte kemcingin, Biakna thutawh helhsiam ding pen thupi kasa mahmah hi.

Zomi sungah mi lamdang khatin zong kaciamteh hi. Pu Thang pen kum ( 76 ) hi-in, Pi Nuam pen kum ( 18 ) hipan hi. Hih thupiang kangaih sut teh, Leitung-a gam khangtote tawh tanbang kikimta ei, cih kangaihsun hi. Zomi sungah thulamdang khat inzongh katuat hi. Minam leh gam ading nasepna ah thahatna ong hita hen! Amen.

April 27, 2013 Saturday ni-in Zongeina tawh Mohelna kinei in, April 28, 1013 Sunday, ( 8:00 AM ) hun-in Christian ngeina tawh Siangtho kitenna, Rev. Dr. Samuel Awn Za Dal, ( Founder & President of Rhema Bible College for Missions, Senior Pastor of Rhema Christian Centre ) in, Pa, Tapa leh Khasiangtho mintawh ong neihsak hi.

Topa'n hih Nupa te, thupha hong pia-a Gam leh Minam ading'n mabante kum sawt Taang bang damin ong zoptoh zawh nading-uh thungetna tawh panpih tekni. Pu Cin Sian Thang kemding, ma panpih ding leh pumkhat, Innkuan khat dinga, anuntakna khempeuh kipiakhia-a, itna tawh khensatna anei, San Nuam zongh Topa'n thupha hong piaksak tahen! Amen.

Directed by Dal Sian Hung

Zomi Foundation Home Mission

Kuala Lumpur, Malaysia.

Ph: 011-1573-1275; 016-355-4469

See More...

Zomi mipi te leh ZCD holimna

Topa Tungah Lungdam Kohna leh Holimna - Topa'

vang leh Zomi' vang in Zomi Congress for Democracy in Bethel Baptist

Church, Kalaymyo ah picingtakin April 3, 2013 ni-in biakna makaipite,

Zomi mediate, kipawlna makaipite leh Zomipihte zawnin Zomi ading

mapang khophuaithu' limcite phawkkhak theihnang neekngaihna nei hi.

Lasaksiam Cing Pi, Khamno ( Mual Hoih Gospel ), Zam Bawi ( Tahan

Baptist Church ) leh Cing Cing ( Agape Church ) ten minamitna la sakna

nei-in Siamsin leh Zomi Youth Association ten script record leh vedio

record hongla uhi. Zomi Christian Literature Society in Zomibup ading

Topa' thupha hong ngen hi.  Keelki banga- i ngaihsut politics leh

religion, Zomi Baptist Convention Myanmar in " NGALLIAM ZUAPA "

pahtawina political makaipi Pu Chin Sian Thang hong piakciangin tui

banga, Zomi-ading, hongluang khawm tahi. " Apah takhuai Zomi dang a-om

leh kipah tawilai ding hi." ci-in Rev. Dr. Pau Khan Khai, Global Zomi

Alliance, in hongpulak banah amahmahin ZCD Kalay ading cihpiak kyat 1

lakh hong piakhia hi. Rev. Dr. Felix Lian Khen Thang, Bishop of Kalay

Diocese, in ZCD tawh hunlemkhat ciang kimunuam cih leh Rev. Dr. Cin Do

Kham in ZCD ngimna leh gelna laidal hoih mahmah tawh hawmkhiat

zawhnading panpih hi cihzong hong tangko lai hi.

Pu Chin Sian Thang thugenpi aman khitciangin thudot nam 9 mimal 6

tungpan dotna pen Pu Chin Sian Thang in dawngkik hi. ZCD Kalay i

thusiamna tawh hongpai ( biaknapawlpi, kipawlna leh mimal ) mimal 200

phial tawh itna-annkuang ki-umkhawm hi.

Zomi Association of Malaysia in " FATHER OF ZOMI ", Zomi Innkuan USA,

Inc. in " ZOMI NATIONAL FREEDOM AWARD " pahtawina political makaipi Pu

Chin Sian Thang hong piaknate phatakin enpha leng Zomite tui bang

luang khawm ta hi; Zomi' zingsol hong suakta hi-ici theih tadiam?

Minam ading mapang toto lai ni!

Anthony Pu Kap Khan Khual

Central Executive Committee Member

Information Section

Zomi Congress for Democracy

Yangon, Myanmar

See More...

ZCD activity update (20-22 March 2013)

   Trust Building for Peace

                                                                                     Shan State and Kayah State

Shan State leh Kayah State sunga political parties leh cease-fire groups te makai-in " Trust Building for Peace "  thulu tawh Lashio ah March 20 - 22, ni 3 workshop, kikupkhopna ah Zomi Congress for Democracy pan Secretary General Pu Gin Kam Lian in " Registered political parties 53 bang phakna-in kimuan zawhlohna hong lak-hi. Panglong thukimna bulphuhin Constitution athak geltzawh masiah kilemna diktak omzohloh ban-ah mimal noptuamna om ngeilo ding hi." cih genna tung tawn-in mipin thangah mah mah hi. 

Hih workshop pan thukimna hon khat kingah in athupi-in " Constitution athak gelt pha ding " cih-hi. Kum 2014 ma-in hih sang athupi zaw Karen State ah bawl-in NLD zong sam ding cih hi. Workshop akah political parties, civil societies,cease-fire groups leh Embassies, akigawm, 47 pha hi.

Anthony Pu Kap Khan Khual

Central Executive Committee Member

Information Section

Zomi Congress for Democracy

Yangon, Burma

See More...

ZCD activity update (07 March 2013)

United Nationalities Alliance leh National League for Democracy-LA 

March 6, 2013 ni-in SNLD makai Khun Htun Oo inn ah UNA leh NLD-LA nai 3 sung holimna ah ZCD pan Pu Gin Kam Lian, Pu Zam Mung, Pu Kam Lam Khup leh Anthony Pu Kap Khan Khual te zong kihel theih hi. UNA piankhiatna, sepkhiatna leh dinmun te UNA in pulaak in NLD-LA in zong NLD-LA piankhiatna, sepkhiatna leh dinmun te pulaak khia hi. Panglong Thukimna bulphuh in hlutdaw pua lam ah khawmpi bawl kul, kilemna ding muanna ( Trust for Peace ) kul leh Upadipi ( Constitution 2008 ) athak gelt kul cih thu 3 kikupna tung tawn in dinmun kibatna kimukhia hi. 2015 ma sepkhop theih ding te zong kikum khawm theih hi.

                                                                       United Nationalities Alliance leh Public International Law @ Policy Group

March 7, 2013 ni-in U Khun Htun Oo inn mah ah UNA in PILPG tawh holimna nei hi. PILPG pen sitni kipawlna NGO khat hi in Washintong DC ah a zumpi uh om hi. Gam ki-ukna    kikhel lai tak tuah khak, muh khak ding te zawltak leh nuamtak in kantan zawh nang a kisam " theihna " ( Knowledge, Technical assistance ) te a hawm khai kipawlna khat hi. Burma ah zong zum hong in, ethnic political parties, civil societies, leh hluatdaw kosale ( Member of Parliament- elect ) te theihna hawm khak zawh nang tintan ( training ) pia ding ci hi. ZCD pan Pu Gin Kam Lian leh Anthony Pu Kap Khan Khual zong kihel hi.

                                                                      United Nationalities Alliance leh New York Time

March 7, 2013 mah in journalist Thomas Fuller tawh UNA, U Khun Htun Oo inn ah kimu hi. Ih gam sung a thu om teng  pulaakna ki nei khawm hi. Pu Gin Kam Lian leh Anthony Pu Kap Khan Khual zong ki hel.

Anthony Kap Khan Khual

Central Executive Committee Member

Information Officer

Zomi Congress for Democracy

Yangon, Burma

See More...

ZCD pan Zomi nampi ni tangkona (Kawllai)

See More...