Zogam ah, India leh Japan ii huhna

25th April 2013: Abeisa hun ah izaksa ahi India huhna Zogam ah nasep kipan aa, ei tawh kinai hamphatna ding in Mualbem khua taw gunlei bawlna ding leh Gamlai khua Siamsinna Sang inn phuah phatna ding in kihel ahihi. Sum bangzah kizang ding cih diktak in kan theih theina om nailo ahihi.

Tua ban ah JICC pan in huhna zong Tedim zato siamah te omna ding innlamh sak ding in gelna ngah ahihi. Azom ah Theizang khua leh Lailui khua puah nading zong tulaitak in Zogam Mangputal zumah ngetsakna lai omzo ahihi. Zogam Mangputal te diksak na aomleh lametna kinei ahihi.

Sapan leh Zozang khua lampi kipuahna zong Tin Win Thun Company te in nasep zom kik leuleu uh aa,Sapan tungto kuanta ahi man in lungdam huai mahmah ahihi.

Zato Siamah te innlamh ding, Mualbeem khuataw gunlei bawl ding, Gamlai sanginn lam ding cih nasep te asem ding Company te leh Zogam Mangputal kizom khin uh hi a, Company nasep vaipuak nei te in akisam bangbang in sep kipan ta uh ahihi.

Tulai tak in zong Tedim khuapi Sakollam veng ah kumpi huhna sum Kyats 450,00,000/- manh Siamsinna sang innpi khat kilam a, kizo kuankuan ta hi. Tedim Sangpi pen Sangnaupang kitam mahmah ta hih man in sang inn behlap ding akisap zawh sawt zo mahmah ahihi.

Hau Thang

See More...

Mualbeem khua aa Singlamteh kiphuk

Mualbem khua Singlamteh Naikhuampi om non lo ahih manin ka thanem na thu- tawm kong gen nuam hi.

Mualbem khua AG Silver Jubilee (mi 16)te' Pasian pahtawina leh Khualetui a ding thupha khat teitei bawl ni ci a hanciamna tawh a kibawl hi a, 26/3/2009 ni in Hausapa (Kai Sian Mung) Upate leh MCF (Mualbem Christian Family) vai hawmna tawh Khuazang bup kikhawm in Biak piakna ki nei a, Rev. Dr. Khaikhansuan in Honna leh Muh theih gal, Muh mawh gal pan hong dal sak ding in Pasian tungah APNA hong neih sak hi.

Kum 3 sung bang etlawm takin hong ompih khit 11-4-2012 ni in Hausa thak te vai hawmna tawh Bulldozer pi khat tawh hong taih tuk sak ahih man in amah tu in kimu thei non lo hi. Ahih hang in hih thu cik mah ciangin mang ngeilo dinghi. Singlamteh Naikhuampi man attach file ah na en le un cin.

Suksiat kisawm hi cih thu ka zak ciang in ka hih theihzah in ka hanciam a ahih hangin Aanaa nei te vai hawmna ahih man in kikham zo lo hi. Susia taktak hi- cih thu ka zak ciangin Ka tha nem lua ahih in Pasian ap in lung zuan la khat ka phuak hi.

(a) Na ngai ve vua, U le nau aw, Paak bang i tawi, Nazisenpin,
Zinleeng tuak e, vut leh vai suak ta ci ee.

(b) Lung nem lo vua, Bemtuita aw, Sianmang i Biak,na hi e,
Sian in awi, lo ding hi ee.

** Ih Biak Pasian pen a nungta ahih na leh mihingte sim mawh ngam ding ahih lohnate a banban in i mu ding ka um hi.

Ih khanglui ten mualphuh sa botkhia sak le gamgi kek cihte a huat le a zeksak mahmah thukhat hi. Ihgam ah Singlamteh a phukte' tuahphat loh pen khangtampi ngakkul lo a, mulkim huai tampi tawh a nuntak na uh bei zong ommawk hi.

Tu hun ihgam suakta a hibangmah in a ngongtat te ki lawmnawn lo hi. midang te genloh, it tate, ih zi te, ih nau te, i sang naupang te etc... zong mawkvuak hun, mawk simmawh hun hi nawn het lo hi. ih ganhing khawi te nangawn ih mawksuih le thu hong kibawl theih hun hi.

A zenzen in kum 4 a om khin tua Singlamteh pen a botkhiat kul a hihleh a phutte kiang le khuasung upa te, pawlpi maikai MCF (Mualbeem Christian Fellowship ai tam) te kiang ah phala a ngetding hi-a, a thukim khit uhteh, mundang khat ah tuahsak ding hi-a, ngongtat natawh sep het loh ding hoih kasa hi.

Na hauh na liat na pen midang te khasiat na (abuse) in hongzangh kei tapeuh un. Hong lungnop lohpih,

Zambawi
Go Chin Zam

Kalsuan dan kinaak khialh mahmah sa-ing. Khua leh tui puahding pen a omsa suksiat kul sese lohi. A omsa khat puah ding sang, suksiat ding sawm sese cihpen khansiat na taktak hilel hi. Midang sadang zong hilo, ei teng mah, mi khat khasiat nading aa gamta se cihpen awi kai sa lo hi'ng.

Mawtaw lam zikna in tua naitau, Singlamteh phung nawk tektek hen cihna omlohi. Nawkloh aphamawh ahihleh mawtaw lam ziikloh ding hilel hi. Gam kikhel, thuneihna kilaih lam phawk nailo, Singlamteh phuk khawng tawh akipaakta ding sakha hiding hihang.

Tu aa bang aa ngongtatna pongpong i pu i pa khang aa kipan kipaaktalo, daupailo zaw hi. aphuuk te'n a lamkik ding uh deihhuai sa-ing. Biakna vai, Pawlpi vai takei leh taang lai aa kipan i pu, i pa te'n mimal mualsuang nangawn kisim mawhsak ngeilo uhhi. (Tua mualsuang tung ah midang simmawhna kigelh ahihkei naakleh) Mipi, taangpi, taangta thuneihna damdam in ong kitelto tektek nading ahihmel zong kitheilohi.

Ngongtatna pongpong bel tuhun aa ding hinawnlohi. Atawpna ah hibang tepawl pen ih khua ciat aa Pawlpi Makai, Sia te'n zong avaan ding thupi sa-ing. Ih Siate khat peuh in, "Tua bang aa gamtat ding kilawm sam kei" naci bek le uh hisam dinghi. Na khaam le uh Pawlpi Sia zahtaaklo kuamah ki om samlo hi.

Khuasung ah ki-itna bei cihding hi aa, lungzuan huai mahmah sa-ing. Awikai sakeng. Hausa pa ahizongin a mau unau ahizong in thei-ing. Kamaakte uh, ka tute uh hi. Ong kidong hileh awi het lohi'ng. Lam kik hen. Lampi tuabek om.

Hang Khan Lian

I lawm Thantlang leh Matu lamte gam khawng a thupiangte i za ngei tek ding hi. Amau Singlamteh upna leh deihphatna takpi tawh a phuh khit nak vua leh a kul leh thuakngam, a tawpna ah sihpih ngam zahdongin mapang uh a, thuneiten zong simmawh sak ngam nawn lo uh hi. A taktakin Sia Gobawi' i gen ngei khat ka lungngai kha hi. Singlamteh phuh ding sangin Singlamteh puak ding (i lungsim genna) thupi sak zaw ni, na ci hi. Hi kasa hi. Ahizongin mi pawlkhat ngaihsutna kibang khin lo ahih manin i mit kha leh i lungsim a om thei diak ding, mi tampite' thunget theihna mun ding cihbang in Singlamteh kiphut pen hi zaw dingin ka lamen hi. Tua bang a i phuh khit nungsangin i kep i dal ding ahi hi. Khua mite kithutuak lo na hi uh diam maw? Ih gam hong kikhelna tawh kizui a, mipite' thuneih theihna na telkha man nai lo na hi uh diam maw, lawmlawm; hite pawl mi dik kici khin khol lo a,...? kici thei kha ding hi. Kong lainat pih manuh hi zaw ei, na telsiam vuau.

Peter Khampu

See More...