ZOMI LAKPAN PH.D NGAH MASA PEN DR. LEO MANG CIN HAU TAWH HOLIMNA

Profile: 

Min                        : Dr. Leo Mang Cin Hau

Nu le Pa               : Pu Hau Cin pau & Pi Man Za Ciin

Degrees               : B.Ag, Ph.D (Agriculture) (Moscow)

Khua                      : Tonzang

Beh                        : Sukte

Suahni                  : 1942, October 10

Thubullet             : Thumaan zong ding (To seek the truth)

(You shall know the truth and the truth shall make you free)

Laisinna le nasepna

1947-1953            : Tonzang (Saint Joseph’s Vernicular School)

1953-1960            : Saint Peter’s High School, Mandalay

1960-1965            : Mandalay University (Faculty of Agriculture) B.Ag Degree

1965 Nov- 1970 Nov: Russia, Moscow (Agricultural Academy of Sciences) Ph.D

1965                       : Agricultural Research (Kyukone) ( In service tawh sangkah)

1970-1972            : Tutor at Institute of Agriculture, Mandalay

1972-1977            : Assistant lecturer at Institute of Veterinary Science, Insein

1977-1986            : Assistant lecturer, Head of Animal Science Department, Institute of Agriculture, Ye Zin.

1986-1993            : General Manager (Dairy Section) , Mandalay Dairy Development Project ( Australia)

1993-2001            : Self-employed

2002-2006            : Saint Thomas’ Seminary (English hilh)

2006-2008            : PIEC (English & Science hilh)

2008-2010            : MCTA (Assistant High School Head) (Science, Chemistry, English hilh)

2010-2011            : ACACIA (Principal)

2011-2012            : Myanmar Buddhist Orphan Association (MBOA) (English hilh)

2012-present     : ILBC, High School Dept.

Education (Pil sinna) tawh kisai

Zingsol: Ph.D ngah kum, tua huna nang’ kum  le  tuahun a ei mi sungpan angah a om nai hia?

Dr.Leo   : 1970 hi in kakum 28 hi ingh , Kei tawh kum khat sungin Dr.Vum Son in zong ngah.Amah pen East Germany pan Geology tawh hi.

Zingsol: Tua hun pilna zonna ah Zomi khat hihna tawh kizui in haksatna ahi zong nong gen thei dia?

Dr. Leo:  Tua hun a i kumpi te thumaan mahmah lai in amau i hongsawl na tawh akipai hi zaw, amau ong sapna tadensa pan thei in, akisiau toto in, akiteel teng akipai hizaw. Zomi khat kahihna manin haksatna ah om zongin thei kha keng.

Zingsol: Tua le kong dotnop uh khatin hih line pen  nang ut a  teel maw, ahih kei leh athu kituak in ahong piangtawm ahia?

Dawnna: Hih lokhawhna (Agriculture) pen ka-uk mah hi.

Zingsol: Tua hun a kawlgam sinna tawh tua phual a pilna sindan akikhai na?

Dr.Leo:  Aw kikhai lua, teh theih ding hikei e. Gentehna in Kawlgam ah kum 3 kum 4 laisim pen amau kiangah, kum 1 in zo uh hi.

Zingsol: Tua leh tua hun a gamdang tawh ci kei ni, tua hun a kawlgam sung a pilna sindan le tuhun aki khai dia?

Dr. Leo :Tu hun pilna sindan pen sangtawh ka kizop loh zawh sawt in ,atel in genthei ke’ng . Kamuh danin gen le’ng kohun lai a laisimna sang tuhun a laisimna niam zaw leh kilawm. Agricultural lam bel sangzaw leh kilawm sa ingh. Adang te bel laizong limsim khollo, agina a vuan khollo in,degree kingah theilel hihtuak.

Zingsol: Nong ciah kik ciang e kumpi in nasep ding ong vaihawm sak hia?

Dr.Leo: Bangmah ong vaihawm sakna omtuan kei. Kanasepna lui ah onglut kik sak uh.

Zingsol: Dena nasepna ah Veterinarian lamah bang sem cileng degree pen ganhing lam tawh kisai maw leh?

Dr.Leo: Keisin pen ‘Animal Production’ hi. (Ganhing pan a kingah neektheihte :bawngnawi, aktui, sa te tampi ngah nading ganhing khawina) Hih pilna pen Agriculture sangte bekah kihilh sak ahihman a, Vet. Inst. ah avasem kha hi’ng.

Zingsol: Tua leh teldot le’ng production le vet pen koici kikop kik ahia?

Dr.Leo: Veterinary pen ganhingte acinat ciangah a bawldan, zatui pia, zatui sut dante asinna sanghi. Ganhing natna thu tuamtuam, zatui zaha zatding tuamte theih na’ng a hipen hi. Production pen, a cidam penpen ganhingte kiangpan bawngnawi, aktui, sa tuamtuam cihte tampi ngah nang’ bang ci ding cih sinna hi. Lokho, ganhing khawite tawh kisai zaw ahi man hi. Kawlgam ah pen, Vet. Inst. ah sin zaw uh hi.

LOKHAWHNA TAWH KISAI (AGRICULTURAL)

Zingsol: Tua leh lokhawh tawh kisai in ei gam i thanem na?

Dr.Leo: Lokhawh tawh kisai in bel ei lokho ten bangmah kithei lo, kuamah inlah ong hilh lo. Ih sang te mahmah in ahilh te pen a laibu bek ah thahat in ‘practical’ pen thanem. Tuateh agricultural sangte ah zong ei gam, Hilly country aa lokhwah dan ding kihilh hetlo hi.

Zingsol: Hih teng pen leizon le’ng bel haksa incin ahih hang ei khattek in i hihtek theih ding bang bang om thei ding a, hih pilna lampan en le’ng?

Dr. Leo: Amasa in ah eigam ah pen alei mahma kisia tahi. Singkung lopa te kivat mang ahih teh guahtui tawm pah hi. Guah azuktehzong  ahup ding om nawnlo,hawktui-in luangin lei neente taai manghi. Tua in Erosion piangsak hi.Singkung lopa kuaman lah suan kik lo. Singkung omlo ahihteh i lui te kang. Luitui, lopa om nawnlo a’ih cianga vasa le sa dang tuamtuamte zong tawm semsem .Tua hi in abul tak en le’ng, dah huai mahmah hi. Hih teng bawl kik na’ng ahih leh, pilna nei bel kisam veve ding aive.  Hih pilna nei te in sepdan bawldan (technic) te hilh dingin, tua the volunteer te tawh i khua tekah pai dingin singno suan ding. Tua pen first step ( kal masa). Singphuk khawng kham sak ding.Khangno te zong hong hanciam un la i vekpi in i sephuan ding, i sepkhop ding step tampi kisam inteh. Amasa pen i septheih ding pen, singkung phuuklo ding, singno suan ding.

Zingsol: Tua bang hileh eigam ah bangkung bang suan le’ng hoih pen ding a?

Dr.Leo: Amasa pen in bel bangkung bangkung hita leh suanding kisam hi. Leihoih kik na’ng guahzuk na’ng. Tua banah i suan veve i cih leh ei zat theih ding ansing, tehno sing ahi zong, ganhing vas ate neektheih ding ahih leh thei khawng, phihtuu khawng, mawngkung khawng. Vasa hong tam leh ankung hong neeksak lungno te hong tawm ding.

Zingsol: Ei lam a lo i vat,singtaang i vat te e bangci namuh a?

Dr.Leo: Khamtung ah lokhawh ciangin lothak kivatin kum 3 kum 4 khitteh nusia in athak kivat leuleu hi. Tua khitteh a lo masa kikho kik leuleu hi. Tua pen natural regeneration kici hi. I pu i pate hun a amau pen mitam nailo inah, amau hih pen amaan mahmah na hihi.Tua hun ading bel ahoih mahmah hi. Ahih hang tuhun teh mitam i hihciang a, i lokhul pen kumnih, kumthum kingak zolo in kizuan kik a, atua lei pen tatsatlo a kizang ahih cianga alei kisia zaw hi. Tua ahih ciangin mualtung lokhawhna pilna le siamna i sinkul ding hi. Sloping Agricultural Land Technology (SALT) kici-in, Philippines gamah kizang masa pen hi.

Zingsol: Tua leh minam vailam ah pai le’ng tulai tak a i buaina Zomi le Chin vai nang bangcih namuh a?

Dr.Leo: Kei’ muhna lianah pen hih ci. No’ muhna pan bang aci tam bel thei kei ingh. Ke’n tuate khawng pen thupi sakhol ke’ng. Shakespear in bang na ci hiam cih leh, “A rose by any other name smells as sweet.” Gtn in lingpak pen bawngek pak hi naci phial zongin amah hi veve hi. Tua hi in ei pen,i lungsim i ngaihsut athu pi ding kisam sazaw ing. Gtn in Saint Peter sang kakah lai a, kawlpau lah theilo, akawlte ngiat akimu ngeilo hi in ah kawlte’n pen hong nak etneu mahmah hi. Ahih hang,laivuanna khawngah asang pawl a i omteh mi in hong nopneh thei nawnlo hi. Siamna le pilna nei peuh le’ng, hih minte i minamte thupi masa lo hi, aci nuam hi’ng.

Zingsol: Tua leh nam-it acih kammal tungah nang’ muhna?

Dr.Leo: Nam-it i cih pen, Kei “ Zomi kahihna” pen zumlo ding. Kei Zomi hi’ng. Hi mah ingh. Zumpih ke’ng. Kawlpau zong siam ke’ng. Zum tuan ke’ng . Ahih hang, “ Kei Zomi hi’ng. Ko hong ong thupibawl zaw un,” cih te pawl bel deihhuai sake’ng. Kawl ahi zong, Zo ahi zong, i manphatna akibangkimhihang. Pasian thu-um vive i hihteh, ei i hihna (identity) zumpih le’ng, ei a hong bawlpa amawhsak suak ding hihang.

Zingsol: Ko kongdot khakloh uh nong gennop bangbang?

Dr. Leo: Kei hong gennop ah bel, Chin Culture i cihbel i Pu i Pate ngeina ahoih teng i kepding hi. Ahi zongin, a omlo pi om, i cih pen kisam sake’ng. Gentehna in lailam ahi zong, limsuaihna lam (painting) ahi zong neilo hihang. “Let’s accept the facts”. Gentehna, en i khutgelh lai (written word) bang kinei in ui in hong neeksak cih te phuaktawm (fiction) vai mahmah sa ingh. Mipil khat i genna ah, eite koipan kipan cih thupi kei ci, koiciang tung i hiam cih thupi zaw, cihi. Tuapen hoihsa mahmah ingh.

Tua khit teh kong gennop lai khat pen, ko neulai khawngin ei Zomi te pen thumaan a hong kithei in tua zong ei i manphatna (value) in ikep ding.I “honesty” i kepzo ding thupi. Zuauphuak lo ding cihte pawl maw. Tuate thupi sa ingh.

Zingsol: Sang naupang te tungah e nong gennop a om dia?

Dr.Leo: Laisin te tungah kong vaikhak nop ah ei manphatna ( value)  pen skills & knowledge ( siamna & theihna)hi. Tua pen akhan theihna’ng bawl huai. Sang a, kihilh ciangbek tawh hilo ding kantawm ding. Tulai ah pen lai-on’ ding kithupi sak lua. 4 D, 5D ngah ding. Tua hilo ding in i theih ding i siam ding thupi zaw. Lai ong kahih manin, athei hilo ding in, thei kahih manin laivuan a ong hi zaw ding.Theih ding akilawm khempeuh, nong theih dinguh hong hanciam un.

See More...

Zosuan Tuailai Khawmpi (a ni masa)

Click: Maan dang te hiah ki en thei hi. 

Pasian in a beisa kha nga leh a lang sung gelkholhna, kiginkholna a hi, Zosuan Tuailai Khawmpi pen Geelsa om bangin tuni June 5, 2013 nitak nai 8:20 in Rev. Dr. Do Suan Mung leh Zosuan Tuailai Khawmpi Main Committee President Pa Suang Za Nang in Laikhau attanna tawh pawi hun ki hong hi.

Kipatna dingin Rev. Khup Khen Pau, Senior Pastor, CMBC in pawi hun khempeuh apna hong nei hi. Tedim Laipian Pawlpi panin Zola leh laamna tawh zinte hong muak uha, Tua khit ciangin Zosuan Tuailai Khawmpi hong pian theih nadinga phukhia Zomi Innkuan, Singapore khangnote' taangin Pa Hang Khan Lian in Thungenna hong nei hi. 

Pa Hang Khan Lian in a genna ah Zosuan Tuailai Khawmpi pen a omsa kipawlna demna a hih lohna, Zogam leitang manphatna, Zogam pana piang thawhbat, meiteimul a sungsante pumkhat pen Singapore ah a lei teh Kawlgama Siikkang dal khat man zah a hihna, leitunga coffee hoihpen nam Zogam ah a pianna, Kumpi lamah pang dena a huh banah a langpang ngei lo Zomi leh Zogam ah thau tawi galgim hong namna, mihingte leivui pana piang i hih manin leitang mahmah pen zahtaak huai a hihna, i pianna "Nu" khat a hihna, Tua leitang pen gamdangmite kiangah zuaka puaksak ding a hih lohna, i kiim i paama minam tuamtuamte, pau nam tuamtuamte tawh i kihotheih kei leh a kinuntak zawh lohna, namdang khat peuh simmawh elbawl gawp ding a hih lohna cihte leh thu tuamtuam te genkhia hi. 

Tua khit ciangin ZTKhawmpi President Pa Suang Za Nang in pilna siamna tawh hi lo-in i neih ngei nai loh khat i sepkhiat theih nadinga mapan Zomi Innkuan, Singapore leh lungsim, thatang, hun leh sum leh pai tawh hong panpih te tungah lungdamna, Khawmpi hih ciang i lawhcin theihna pen Zomite kipumkhat tatak i hihna, khual leh tual pan Khawmpi hong siim Sanggam Zomi khempeuh tung a lungdamna, pawlpi tuamtuam khut kilena ma i pankhopna te hang a hi hi. Ka kicin lohnate uh nomau tawh Zomi i hih khawmna hangin nong telsiam ding uh ka  lamen hi cihte hong pulak khia hi .

Main Committee panin Cinpu in mipi hong pai te mel kilah sakna hong nei-a, guahzu daikai nuai tatak pan mipi hizah i kikaihkhop theih pen Minam i it man tatak a hihna, hih khawmpi a piankhiat theihna dinga ma hong bang te tungah a lungdam mah bangin Khawmpi a picingna dinga hong pai mipi, MP te, la leh tumging lam te hong uk kumpi te tung ah lungdamna thute gen khia hi. 

tua khit ciangin  Tedim Laipian Pawlpi in Zomite' lungtup tui bang a tun nading Zo lapi hong paih hi. 

Tua khit ciangin Rev. Dr. Do Suan Mung in Zomite cihtakna, kuhkalna, sepkhiat ngamna, geelkhiat ngamna, dinmun kip deih ding a hihna, lam nuam bek tawh khantoh sawm ding a hih lohna, i sup lawh i sih lawh leh zong thutang ah ding ding a thupina cihte a kipan Khangnote in i nuntakpih ding a kisam thumanphate hong genkhia hi.

Tua khit ciangin Zomi Lasiam Lawhcing Thawn Kham in a lungtang pana hong phulkhia la manpha te hong awih hi. zan 11;00 hong sawt kheng val ta a hih manin mipi cidamna akhualna un Lasian Lawhcing Esther Cingsan leh San Nuam te in hong pai lai ding nite ah a sak dingin la hoih tampi kigingsa-in zintek kizuan hi.

Min list aapna ah mipi hong tun behbeh lai hi. June kha sang kihong khin, Zogam khuate lo khawhna gam vive a hih manin lo kin lua a hong paikim man lo zong om hi. NGO nasepna khua pawlkhat ah panmun letna hang tawh hong pai man nai lo mipi tampi om hi. 

Leitung piancil pan a khatveina Tedim a i bawl , June 5-9, 2013 ni-a i neih  Zosuan Tuailai Khawmpi, ah zintun ni in khual pan mi 520 val hong tung man khin hi. Hong tungsa khua pen khua 80 val phata hi. Khua kim panin hong kipaikim mahmah hi cih kimukhia hi. 

Moreh pan leh Mizoram khua 7 panin mi 30 val hong pha thei uha suan leh muan migil honkhat hong kihel thei uh hi.

CCJ hall kidim phitphet mawk ahih manin Tedim khua leh a kiim a paan khuate khempeuh zong Zosuan Tuailai Khawmpi tungtaang ah kithutuak kilungtuak mahmah hi cih kimu thei hi. 

Kipawlna leh NGO cihte bangin hong paite sum leh pai, nitha, anneek tuidawn a kipia zo cih bang hi lo a hih manin Zomite in Zomite' nuntak khuasak nadingin sum leh pai sangin thu hoih thu manpha a lunggulhzawkna uh kimukhia thei hi.

Khual pana hong pai i laizomte  Tedim khuazang in zong sep theih tawpin muakte uh hi.
A ni 2 ni, zingsang daak 8:00 lap dingin an hong pia ding uha zing teh thulupi nih sun thapai kikupna om ding hi. 

Zosuan Tuailai Khawmpi a tangtunna pen thanemna hong hilhzel itna lungsim a nei lawm leh gual, thapiakna hong nei zel upa simvom sanggamte, hangsanna tawh ma hong panpih Pasian hang leh Zomite' kipawlna khempeuh, mimal kim in a thukimpihna hang za hi hi.

Tua in Zosuan Tuailai Khawmpi  thubulphuh "A Bucing Khantohna Ah" cih ii lampi kiphatna a hi hi.

Cinpu
Information
Zosuan Tuailai Khawmpi
June 5-9,2013
Tedim

See More...

Zogam ah Toll Gate masa pen

Zogam a Toll Gate masa pen Tonzaang khawk (township) sung a om, New Dalkhai leh Old Dalkhai khua te kikal ah Zogam a ding, a masa pen Toll gate( Lampi zat man sum don na ) om cih thu Khua makai te tungpan kiza hi.

New Dalkhai Mawtaw

Hih khua te gel pen Indai gamgi a om khua te hi in, Kawlgam lam pan mawtaw a lut thei loh hang India lam pan mawtaw lim lut mah mah hi. Indai lam pan Kawl gam a lut suk ciang in, Old Dalkhai tawn masa a hi man in, New Dalkhai a pai sak suak nop uh leh Toll gate ah sum Rs 500-1000 ta Old Dalkhai te piak kul ham tang hi.

Hih thu apiang khiat na pen New Dalkhai gam sung a Taak Singkung te Old Dalkhai ten India lam ah zuak ding in phuk sak uh a New Dalkhai ten phal lo uh hi. Tua thu hang in Old Dalkhai ten New Dalkhai mawtaw te tung Toll gate sum dong uh hi.

New Dalkhai Mawtaw

Kawl kumpi te mawtaw lam projcet zong Project lai ah Tonzang-Naakzaang -Zampi leh New Dalkhai tawn ding in Project Fund sum a kia sa pen Old Dalkhai ten kumpi thu nei te mai-et zo zaw uh ahih man in, Tedim-Tui Thang- Phil Nak -Old Dalkhai-New Dalkhai- Zampi lam ah to ding in na gel uh hi.

Ambrose Kap

See More...

Zotual lai software

Hong khahkhia sa Zotual Lai mal 37 abulpi in kong khah khia kik uh hi. Online tungah kigelh thei taktak naisam lo ahi. Ahi zong in Software zang in asin nuam te ading in laimal bulpi hih tengsungpan kisin tawm thei ding ahihi.

Zotual Lai Consonants

Hih laimal bulpi nung a thu gual kigelh te "aw suak thei ding ciang akinai pen tawh kong gelh khiat hi in hihsang akicingzaw ding Zomi sungah ah hong gelhthei tampi om ding ka lam en hi. Computer Key Map for Zotual Lai Fonts leh Aw khen na te hunlem bang in Lawmte tawh hong khah kik ding honghan ciam lai nung. Maban ahoih zaw leh Laimal isiam ciang in akilawm nono in puah to lai ding Zomi tuailai te kong han thawn hi.

Minam dang mipil te in Zum tuamtuam te ah amau minam lai uh tawh amin akhua gelh uh hi. Ei te in Kawllai Mikang lai in I min suai ikaih pen hong amau te in nam lian in hong muthei lo pah ding in ka ngaih sun hi. Hih Zotual lai pen aham pi ni7 sung in khangno lai te avek in gelh thei uh a, Amin uh zong gelh thei pah uh ahihi.

Zotual Lai Vowels & Diphthongs

I aw suah zui in Aw khen na asangsau, aw eu, awkui, aw ulgin om man in awkhen na pen kikup huai mahmah ding tampi om lai ahihi. Zotual Lai tawh i min tek igelh theih siam na ding han ciam ciat ni.

Hau Thang

See More...

Zotual lai font

Zotual Lai bang cigelh ding? Bangci sinding?, Kulnawn kei, Kisam naikei, Puah laiding hi' ABC mah zatding hizaw hi' ABC tawh lai gelhkisiam himan hih sin ding hi.

Hih puah tohding hi' cih thu tampi aom sung pan in tu in na Computer tungah bangci bang in Zotual Lai ki khen ding hiam? cih Zotual lai Key map kong hawm khia kik leuleu uh hi.

Ngaih sutna akibanglo bilbial teng mah akigelh lai thu te pen Laisim te ading in alim mahmah gil khial hun teh i nek an tawh kibang hi. Lai dangte tawh teh kak na in Zotual Lai in manlang tak huntawh kizui Computer in kizangthei suak ahihi. Minam namdang te lai te ahi Kawl lai, China lai, ABC Lai, Hindin Lai, Muslim lai Thailand Lai , India Tamil lai te cih te in Computer tungah akigelh theih na ding in akum 3000 sim bang hun nei lai ahihi.

Tu in hih Pasian hong hilh Zomi nam te lai ding i Zotual Lai in hun toino kum 200 cing nai lopi in Computer tungah aki gelh theih pen Zomi te Pasian in manlang tak in honglap sang na ki mu khia ahihi.

Bangci bang in Siktawlai in kikhen thei ding hiam cih lungsim vangik pi Zomi mipil te in akineih lai tak in olno tak in Zotual lai khen theih na ding Computer hong pia khia tung tawn in vaisah mahmah khat Zomi te in ma tun thei hong suak ahihi.

Hih Zotual lai hang in mitampi khat mah in angaih sut na in atuamtuam hong gen pih na zong om aa, auk kiom pah in, asin nuam zong om hi. Pawl khat te in kulsa nawn lozong om hi. Pawlkhat te in Cope Topa hongbawlsak mah zang ni aci zong om hi. Hih te ngaihsutna thu sun na vive hi a, Mailam hun ah Pasian deihna bang bang in Zomi mipil te tungpan hong piang lai ding ahihi.

Hih Zotual Lai software, Laimal bulpi te leh Key map te hong kihawm khiat na hang in tu a izat Cope pa hongbawl sak lainual suat pah ding hi tuan peuh lo hi. Hih ABC Cope Topa hongbawl sak Lai tung tawn in Awsuah awkhen na ahoih nono akhiatna akitel semsem laimal kimu thak ding ahihi. Abeisa hun in ABC laimal tawh laimal kibang khiatna tuamtuam cih zong Zomi pi teng tung ah kong khah khia ngei zo hi. Awsuak sak thei tezong kong hawm khia ngei zo hi.

Tua hun in zong kuppih na tampi mah hong lutlut ahihi. Hih Zotual Lai tawh kipawl in hong kihawm khiat hang in kei mahmah zong asiam athei ka hi tuan nai kei a, auk te in hong phuah semsem a, ZOLAI GRAMMAR hoih mahmah laibu kinei baih ding kalam enhi.

Hau Thang

See More...

Zola owntune kidemna a masa pen

 Zomi Own Tune ki dem na 25/3/2012 ni in Malaysia Canaan Biak inn ah Nuam tak in Pasian in ong gual zawh pih hi....

Canaan(ZCF) Biak inn Kuala lumpur , Malaysia ah 25/3/2012 ni sun lam nai 2pm pawl in mipi tampi leh blue color tawh T- shirt (a tung a Zomi Owntune) cih a ki gelh puan vive tawh la ki dem ding te leh ZCF khang no khempeuh pen biak inn sung ah mun hong la dimdiam ta hi..... Own Tune la ki dem ding te pen ka et dan ah lawp tuak mahmah leh a mahleh a mah ki muan na lianpi tawh a tut na ding biak inn a mai lam ah hong tu dimdiam uh hi... Score pia ding te zong Mipi laizang pawl ah sabuai 1 tawh mun hong la uh hi..... Score pia lak pan U Kam Sen pen Haksat na tampi tawh ong pai zo lo in a ma piak ding a ki seh Timing pen U Mung Mung (Blessed) hong let sak kawm hi............

Zomi Own Tune akhatna angah Solomon Tuang

Score piak dan a cing in thulu pi pen (Timing/Performance/Lamal gualh dan/ La aw ( Tune) leh mipi lam pan score piak na ban ah,, a thuluno pawl khat te [lunglut tak a sa maw (Serious maw)/Melody Hoih maw/La sa te aw (Voice)/ La in ki lamdan na nei maw/la mal gualh dan maan maw/ zo la mal lawh dan/ la in khiat na nei maw or la mal in la thulu man kik zo maw/Timing khial maw/ aw kah, aw kia/ Intro,ending/ mipi sungsim la zo maw/ lamal ngah maw cih teng tawh score a ki pia hi ,

La ki dem ding te MC a hi ZCF Youth President Vai leh Secretary Khai Sian in sam pah ngekngek in lasa ki dem te zong hanciam tak leh siam tak in ongki dem ziah ziah uh hi...
La sa khat/ la ki dem khat a man khin phet in score pia ten zong la sa nu/la sa pa a ki sap na teng gen khia pah ngek ngek hi........ La ki dem pen mi 24 bang pha a hih man in a tawp na lam a, a sa/ ki dem te pen ong gim pian ta hi na pi nakpi tak hanciam na tawh la hoih tak mah in ong ki dem thei uh hi....

Zomi Own Tune pan Top 10 ngahteng (Pau Suan Thang - Thangpi kihel theilo)

Nitak lam 6pm ong sat ciang la ki dem khempeuh ong man ta hinapi Score piateng pen mattuat in ong buai san mah mah uhhi. Tua zawh a sawt lo in..... Score pia sung pan Mung Mung (Blessed) leh Deih Mang (Sower Sister) te Stage tung ong kah uh aa la ki dem khem peuh in zong kua a khat na a ngah tam cih theih nop na,dip kuan na tawh Stage lam ong en to dimdiam uh hi...

A khat na pulak madeuh uh la ki dem khem peuh letsong no khat tek pia in Stage tung ah hong ding zihzaih uh hi..... Tua khin ciang Top Ten teng ong puak lak leuleu se uh ahih man un,, Top Ten teng zong a dip uh kua mahmah in zong ki lam en ciat uh lai tak, tua Top Ten sung pan Min 3 ongsam khia leuleu uhhi. Tua teng pen... J.K Zom, Solomon Tuang leh Sian Cin te hi uh a, tua Taangval 3 tengzong a lungsim sung vuah [bang bang hi leh ken ngah ta ing ey] cih lungsim leh ki pahna lungsim tawh a lawmteng mai ah ong ding khia uh hi......

Top 3 tengin dip kisai lutlut in a ngaklaitak

Tua khiat ciang in A thum na a ngah letsong Rm100 pia ding in Score pialah ahi Zomi sung ah i la siam/phuak min thang a hi Pa Suanno (Phat ding ki lawm) Stage tung ah ong ding khinteh a thum na a ngahSian Cin let song piak na ong nei hi..... Tua khit ciang mi 2 cian lai..... A nih na ki pulak ding hi ta.... Letsong RM150 pia ding ZCF Youth President a hi Vai zong Stage tung ah ong tung khin ciang a nihna ngah J.K Zommin ong ki sam mawk a hih man in, akhat na a ngahlam akitheita ahi Solomon Tuang zong a lawm teng tawh khut ki len in Stage tung ah buai mahmah / ki pak mah mah hi. Tua khitciang a khat na letsong pia ding in ZCF Church President Pa Pau (Thawng Khen Pau) zong Stage tung ah hong kah in Zomi Own Tune ong ngah khia Solomon Tuang pen Lungdampih na laidalpi leh Rm200 hong pia khia hi.....

Zomi Own Tune pan akhatna ngahpa lasakna zong YouTube pan ki enthei hi.
http://www.youtube.com/watch?v=xLy8qn-QnDQ

A khat vei Zomi Own Tune la ki dem na pen I biak Pasian in nopci tak leh picing tak in ong gual zawh pih hi, ci-in ZCF khangno makai te a hi zong in khangno khempeuh zong lungkim mah mah uh aa, Pasian tung ah lungdam koh thunget khopna hun tomno khat zong vai teng a man uh ciang nei thei pah uh hi......

See More...