Zomi bup dah ngei ni (1/2)

TEDIM ACCIDENT VICTIMS RELIEF FUND  VAI TANGKONA (TAVRF)

Leitung bup Zomi sanggam khempeuh,

A muan huai vanglian Pasian kepna lim nuaiah Zomi laizomte I omna mun le gam ciatah damin maban a zom thei ding i thungetna hi sak hang. Tu sung teng Cope Centennial Jubilee Celebration pawipi vai tawh kisai thu tuamtuam i zak banah a diakdiak in Tongzang pan pawi sim i sanggamte tuanna Zo Tang Express te' Bus tuahsiatna thuthang ( Breaking News) pen Zomite sung bek hi loin, leitungbup News, TV and Radio Boarcasting te pan kipulak ziahziah hi.

Hih bang thusia (Bad News) tungtang thu i ngaihsut ciangin asi a liamte, innkuanpihte leh meltheih khua le tui bek hi nawn loin, Zomi bup dahna lianpi hong pian ni zong ahi hi. Zanni Nov. 25, ni-in mi 14 si cih kithei a, tuni Nov. 26,2010 ni ciang ciang mi 17 bang sikhin ta cih Tongsan leh Zonet pan i mu leuleu hi. Tua banah aliam leh abaai hon khatte zato ah tulaitak kibuaipih mahmah cihte i theihsa ciat ahi hi. A site luang hawm zong a khua atui ciat ah motor mah tawh kipuak kawikawi cih bang i zak ciangin, i khuasikmul thoin i lainatpih ciat ding i kilamen hi. Tua bang akipuakte zong Motor sap a mawkna hi khinlo thei lai ding hi.  

Tua hi-in hih bang thusia/ vaisia i tuahna pen Kha lam thu ah ngaihsun leng Pasian theihna leh phalna sungah a piang thu hi-in, leitung lungsim tawh i ngaihsut ciangin a nusiat innkuanpihte bek hi nawn loin, a laina lo Zomite kua ta om ding hiam cih thu ahi hi. Tua bang hi na pi'n hih tuahsiatna le dahna tungtang ah adiakdiak in tuipi galkai Zomi kipawlnate leh biakna tuamtuamte pan Dahpihna leh lainatpihna laikhak cihte kimu kha nai lo ahih manin, Vaphual itna anei Zomite koi lai tungta i hiam cih huai hi. 

Tongsan leh ZoNet cihte ah minam a it le aveii zaw nuam i kituh/ kisel thapai sangin hih bang hun ciangin kihuh/ kipanpih leh ki-etna tawh i minam itna lahkhiat ding kisam mahmah ahi hi. Zomite tangthu ah tuahsiatna tawh kisai hih zah a lomsihna pen a masa pen leh a tawpna hi ding ahih manin, Zomi a it a veii peuh mahin i hih zawh zahzah tawh minam itna lahkhiat ding i mawhpuak ahi hi. Minam itna pen kimu/ kigenkhia thei lo ahih manin i sepkhiatna leh i piakkhiatna zahzah tawh kiteh/ kilakkhia thei bek hi cih kiphawksak nuam hi hang. Tuni ciangciang thukizakna danah gamdang lam a om (Chin) adeih i sanggam Hakha, Falam leh Matupite kipawlna ahi ( Chin Welfare Association- Sydney, Australia) te in hong lainat mahmah uh a, (sihgalna/ natvehna) ding nasiatak kidong san laitak uh cih Australia Zomite' tung pan kiza hi. A hi zongin Zomi Association of Australia (ZAA) te akipan Zomi kipawlna makaite tawh thukizakna om/ lo cih kiza nai lo hi. 

Tua ahih manin i sanggam dangte in hih zahin hong veii leh laina uh ahih leh ei Zomi kici nuam deuh (Tedim kampau) te in i sanggamte tuahsiatna tawh kisai adiakdiak in Leitungbup Zomi Innkuan Kipawlna (LZI), Nam le gam vai Kipawlna (WZC), Zomi Association etc.., leh a gamgam a om Zomi Innkuan Kipawlna(ZIK), Zomi Christian Fellowship(ZCF) cihte pan a manlang theithei in vaihawm huai hi. Zogam lasa siam Pa Thawn Kham in, " Zogam pan sapna " la sungah  " Liam leh bai, nat le sat ciang kikep kikhoi nang nei lo in, ut lopipi sih hanmual lam zuan uh " cih la lungngai khawm ni.   http://www.youtube.com/watch?v=7G10UTjEM68

Tua hi-in, i sanggamte huhna ding tawh kisai tulaitak ciangciang leitung mun tuamtuam a om Zomi sungah dahpihna leh panpihna ding vaihawmna kician om lo leh  (Chin Welfare Association of Sydney- NSW, Australia) lamte' ngetna tawh kizui in, leitungbup Zomite' Thukizakna (International Tongsan Media Groups ) min tawh  huhna le panpihna a pia nuamte kong zawn uh hi. Huhna puakna ding tawh kisai-in Tongsan Media tanute in Tedim ah kizopna thupitak kibawl khin ta ahih manin kizopna ding a thei nuamte in Tongsan Media Groups ah kizasak thei hi. Mimal a khak nuamte leh kipawlna tawh a khak nuamte in Tedim (Direct) kikhak thei ding hi. Tua banah kipawlna min khat peuhpeuh tawh a pia nuamte in kipawlna min, saziante limtak pia in,  " Tua.... gam a om Zomite' tung pan CCJ pawi simna pan Tonzang leh Tedim kikal a tuahsiate huhna " ci-in a gamgam a om International Tongsan Consultant & Agent te tawh kizom thei ding hi.

Zomite tangthu sungah CCJ thua kigen simsim in, hong nusia i sanggamte min kilo den ding ahi hi. I sanggam 17 te leh Zato a om i sanggam bangzah hiamte tangthu a kigen simsim in, tuni a huhna le panpihna a pia Zomi NANG leh KEI nasep hoih kigen den ding hi. Khangkhat nuntakna tawh Khangtampi kimang ding minam le Pasian ading NAHOIH sepsawm ciat ni. 

Hih Tedim Tuahsiate Huhna Vaihawm Pawl ( Tedim Accident Victims Relief Fund) vai tawh kisai-in minam veiina tawh Tongsan Media groups leh WZC tanute sepna ( Co-ordinator) hi-in, a thu kician a thei nuamte in a nuai a Address ah kidong thei den hi. Huhna tawh kisai Tedim lam ah Thuvan dingte in amau vaihawmna bangbang uh kiciantak hong zasak kik ding uh hi. Tua hi in, hih Tangkona na ngah hunhun akipan in kipawlna leh mimal min tawh manlang theithei in khensatna hong zasak pah un. A zekai penpen mai kalsung teitei in Tedim a Thuvante khut tungtawn in genthei/ tuahsia i sanggamte kiang tungsak nuam hi hang. Zomite Topan hong ompih hen!!!

Note: Hih Tedim Tuahsiate huhna ding tawh kisai zingciang November 28,2010, Sunday (Chicago Time-7:00AM) hunin WZC Meeting ah nasiatak kikupna om ding hi. A lunglutte in www.tinychat.com/zosum ah kilut thei ding hi.

Kizopna ding munte:

(1) International Tongsan Media Groups
Co-ordinator
Tedim Accident Victims Relief Fund 
Headquaters
Kawlpi, Zogam
Email: tongsan@zomi.org, tongsan.weekly@gmail.com, khamyc@gmail.com
www.tongsan.org

(2) Tg. Nung Sian Tuang & Pa E Khai (President-CCJC Main)
President
Tedim Youth Fellowship
Email: tuangtyf@gmail.com
Tedim, Zogam

(3) Pa Thanglian
General Secretary
World Zomi Congress (WZC)
Email: zozuunsiam@gmail.com
Ph.2148546814
USA

(4) Rev. Paul Khaipu
Co-ordinator
Tedim Accident Victims Relief Fund
Adeilaid, Australia
Email: paulkhaipu@gmail.com
Ph. 08-82806936, 0425234281