Zomi bup dah ngei ni (2/2)

WZC PAN TEDIM ACCIDENT VICTIMS RELIEF FUND VAI TANGKONA (TAVRF)

Leitung bup Zomi sanggam khempeuh,

I omna mun ciatah Pasian kepna tawh damin maban zom thei zel ding kong lamen uh hi. Zomibup thungetna Pasian in hong dawngin i ngaklah mahmah Cope Cenntenial Jubilee Celebration zong dahna kahna kawmkal mah pan gualzawhna ngah i hih manin hong makaih Zomite' Pasian amin kiphat den ta hen!

I theisa ciat mah bangin CCJ pawipi tungtang ah Tonzang - Tedim kikal a nuntakna hong beisante le aliam abai i sanggamte vai Zomi sung bek tham loin i sanggam Chin kici zawdeuhte akipan leitungbup News, TV leh Radio Media khempeuh in hong theihpih thuthang mahmah khat ahi hi. Hih thu pen Zomite sungah CCJ thu akigen simin hong nusia i sanggamte tangthu zong kigen den ding ahi hi. 

Hih asi aliam i sanggamte pen khualzin ngeina mawkmawk bang a tuahsia hi loin, lawp mahmahna tawh CCJ pawipi sim ding kim lai asi aliam sa tawh inn lam kipuak kik cih ngaihsut haksa mahmah thu ahi hi. Hih thu i ngaihsut kikkik ciangin a innkuanpihte leh meltheih khua le tui bek tham loin, Zomi bup dahna lianpi hong pian ni khat suak mawk hi. A site a sikhin ahi phial zongin aliam abaai honpi khat mah tulaitak Zato ah kibuaipih mahmah cih kiza hi.

Tongsan Media leh Groups tuamtuam pan i muhsa ciat mah bangin Australia a om i sanggam Hakha, Falam leh Matupi te' kipawlna (Chin Welfare Association- Sydney, Australia) te in hong lainatpih mahmah uh a, Rev. Paul Khaipu( Adeilaid, Aust) tungtawn in kizom uh a, " Tedim Accident Victims Relief Fund " min tawh kaihkhopna nei uh cih kiza hi. Tua hi in,Vaphual itna i neihpih Chin min pua zawdeuh i sanggamte in hih zah a hong veii ahihna tawh kizui-in ei Zomi (Tedim kampau)te koi lai tungta i hiam cih khatin i lungsim hong sukha mahmah hi.

Tua bang kawmkal ah Zomite sung pan vaihawmna om loh ciangin, minam vai ah kipawlna i neihsun ahi World Zomi Congress (WZC) in November 28,2010 (Sunday) ni-in EC Thukin Kikupna (Executive Committee Emergency Meeting) kinei a thukhensatna No. 2. tawh kizui-in leitungbup a om Zomite sungah atawm atam apia nuamte in panpih theihna ding lunggulhna tawh WZC in Tanu/ Palai sem ding khensatna kinei hi. Hih thu tawh kisai-in gam tuamtuam a om Zomi Innkuan Kipawlna, Zomi Christian Fellowship, Zomi Church te leh khua le tui kipawlna tuamtuam min tawh kipia thei dingin kikhensat hi. Tua bang akipiate WZC min puasak loin amau mimal min/ kipawlna minte pua in kipia ding ahi hi.

Sum khakna ding leh kizopna tawh kisai-in a gamgam ah palai muan huai kikoihsak a, tua palaite tungtawn in kikhak ding hi. Kawlgam lam pan sum ngah/sum sang ding Palaite zong Tedim CCJ Main Committee te leh Tedim Youth Fellowship (TYF) makaite kikoih khin hi. Sumzatna leh hawm zia ding tawh kisai-in, Tedim Tuahsiate Huhna Sumbul zong Pawl (Tedim Accident Victims Relief Fundraing Committee TAVRFC) te vaipuak kipia khin hi. A gamgam pan panpihna apuakte in mimal min, kipawlna min, sum sazian cihte tawh kiciantak in puak ciat ding uh hi. 

Tua ahih manin Zomite Nett sung khawng ah minam a itna thu vive i kikup tangtang mah bangin hih bang hunah kihuh/ kipanpih leh ki-etna tawh i minam itna lahkhiat ding kisam mahmah ahi hi. Tutung petpet in Zomi i itna le i veiina hong kilang khia taktak ding ahih manin, i mipihte na itna zahzah tawh minam itna lahkhiat ciat dingin i kizawn hi. Minam itna pen kimu/ kigenkhia thei lo ahih manin i sepkhiatna leh i piakkhiatna zahzah tawh kiteh/ kilakkhia thei bek ahi hi. Zogam laphuak le lasa siam Pa Thawn Kham in, " Zogam pan sapna " cih laphuah pen tuni i mitmuh in hong piang takpi ta hi lo hiam?? Khut zepin en mawk ding maw!!!!   
 
Hih TAVRF tawh kisai thu kician athei beh nuamte in anuai a Address khat peuhpeuh ah kidong thei den hi. TARVF tangkona na ngah akipan na khensatna bangbang uh nang/ no tawh kinai pen Palaite kiangah zasak pah un. Damloh/ dongtuakte huhna ding ahih mah bangin a nunung pen December 14,2010 ( Tuesday) ma teitei in TAVRFC ,Tedim tungtawn in i sanggamte khut sung tungsak nuam hi hang. TAVRF tawh kisai thu kician a thei beh nuamte in anuai a Address khat peuhpeuh ah kidong thei den hi.

CCJ tangthu akigensim in hong nusia i sanggamte leh aliam abai teng tangthu kigen den ding a, i sanggamte tangthu a kigen simin tuni a huhna apia NANG leh KEI  nasephoih te khangsawn sawn dong kigengen ding hi. Khangkhat nuntakna tawh khangtampi akimang ding minam le Pasian ading NAHOIH sepsawm ciat ni. 

Kizopna ding munte:

(1) Pa Thanglian                               
General Secretary
World Zomi Congress
Email: zozuunsiam@gmail.com
Ph. 2148546814
USA

(2) Sia Khampeek (Tongsan Pu)
Information Minister of WZC &
Co-ordinator
Tedim Accident Victims Relief Fund 
Email: khampeek@gmail.com
Ph. 0047-46824269
Norway
(3) Tg. Nung Sian Tuang 
President
Tedim Youth Fellowship
Email: tuangtyf@gmail.com
NRC.4/Tah Tah Nah (N)037792
Tedim, Zogam

(4) Pa E.Khai
President- CCJ Main Committee
Tedim, Zogam

(5) Rev. Paul Khaipu
Co-ordinator
Tedim Accident Victims Relief Fund
Adeilaid, Australia
Email: paulkhaipu@gmail.com
Ph. 08-82806936, 0425234281

(6) Tg. J.K.Kam
Secretary
Zomi Innkuan Norway
Email: jkkam2006@gmail.com
Ph.0047- 46258200
Norway

(7) Tg. Thang Pil Mung
1735-Autumn Wind Ln.
Aurora, IL.60504
Ph. 630-570-1617
Email: thangpil@gmail.com

(8) Tg. Khup Muang
Amarillo, Taxas
Ph: 806-3355675
Email: danialmuang@gmail.com