Dr. Thawng Khan Pau

PAHTAWINA LEH DAHPIHNA:

Zogam, Tedim gam huam Thalmual khua mi Dr. Thawng Khan Pau (D.Min.,Ph.D Cand.), Gualnam beh, Tongsan Agent-Yangon, Visiting Pastor- Yangon EBC, Register of Christian International School of Theology-Yangon in February 25,2010 (8:00 AM) hunin zingsang khanglo nawn loin, Yuzana inn pan hong nusia hi. Dr. Pau pen Zomi sungah sum bawl masa khat hi in, Tedim khuapi sungah mihau a minthang ahi hi. Minam leh Pasian nasepnate ah a sihni ciang dong mah ahih theihna bangin nasem khat ahi hi.  A ma hanciamna mah tawh Zomite sungah Pasian nasem pawl khat Doctor pahtawina (D.D) kipia hi. 

Tua banah Zomi thukizakna Tongsan Weekly News Journal nasepna-ah (Yangon Tongsan Consulntant and Agent)  panmun la in gimna tawlna, sum leh pai leh hun manphate sit loin na husan abei ni ciang dong mah citak takin mapang ahih manin Tongsan Weekly Journal pan zahtakna leh pahtawina i pia hi. Minam leh Pasian gam ading akipiaknate hangin Pasal Pha taktak hihna Tongsan mah pan i pia hi. A nusiat a zi Nu Niang Lam Cing leh a tate 5 te  ading thungetna ah phawk ciat ni. Dr. Pau hong nusiatna hangin, Tongsan Weekly bek hi loin, Zomi bupin supna lianpi kinei hi.

Dahna lianpi tawh,

Tongsan Tanute

See More...

Pu Pum Za Kap

Dated: 31 July 200

Zomi te ii i deih mipi thuneihna leh suahtakna, mihingte ngah ding hamphatna, dikna leh thumaanna, mihing khat leh khat ki zahtakna , ki-itna ki lemna, nopna lungmuanna leh daihna, mipite khantohna ding vaihawmna i ngah theihna dinga Kawlgam sungah tuma kum 20 paisa lai-a hong dingkhia i Zomi political party ZNC President masa Pu Pum Za Kap hong nusiat ni-in gamsung gam pua a om Zomi political activist khempeuh in i mimal in a hi zongin, kipawlna min tuamtuam te tawh a hi zongin dahna hong pulaak kawmin ama tungah zahtakna kong pia uh hi.

Tua tawh kizui mahin Kawlgam democracy ki ukna hong om theihna dinga, politic lam tawh kisai makaihna na hong sepsak leh Zomi min tawh hong dinkhiatpih ZNC party makai te sung pan hong nusia sa, Pu Vungh Za Pau, Pu Khual Za Nang leh Pu Gin Thang te banah khua tuamtuam pan activist hong nusia sa Zomi makai dang khempeuh zong phawk kawmin, amau te tungah zong zahtakna kong pia uh hi.         

Tua mah bangin Zomi, Zogam leh  Zo minam te suahtakna dinga nasepna ah nuntakna, guh leh ban, inn leh lo, sum leh paai, thagui thataang, neihsa lamsa hong suplawh sa mimal a kua mapeuh leh Zomi te i khangui kizom a thumaanna leh cihtakna, siangthona, itna deihsakna leh thukhualna hoihna te hangah thongkiat khaukhih leh bawlsiatna hong thuak lawh Zomi khempeuh zong kong phawk uhaa, ka lungsim sungtawng uh pan kong thuakpihna uh hong pulaak kawmin zahtakna kong pia  uh hi.         

Hong nusiat a zi a ta, a u a nau, a it a ngaih a lawm a gual, a mipih a sa pih, a minam ading in leh Pasian gam a dinga a seppih khempeuhte tungah Pasian Khasiangtho hehnepna hong tung kim ta hen cih ka thungetna uh hi aa, ama lungtup leh ama deih Zogam leh Zo minamte suahtakna, ngahding kilawm hamphatna te hong om theihna ding vaihawmna leh kalsuanna te hong picin theih semsem na dingin, Kawlgam kumpi vaihawmna leh ki ukna haksatna tampi sungah hangsan taka amah i Pu Pum Za Kap maban tuni donga hong zop sak hong dampih lai Pu Chin Sian Thang leh a seppih/a vaihawmpih Zomi Zogam political activist khempeuh Pasian in hong makaih sak hen la, amah i Pu Pum Za Kap hong  deihsak i Zomi Zogam sungah matut gualzawhna suahtakna leh picin na nopna daihna ki-it kilemna te ataka muhtheih dingin Pasian in ama nungsang ah a om lai Zomite maban khempeuh lam tuamtuam panin thupha hong piak sak ta hen.         

Hong nusiat lampi hoihte ko khangno te in ka tunna peuh uh panun hong it Zomi Zogam leh Pasian Gam adingin a hoih thei pen leh a etlawm thei pen dingin ka hih theih zahzah un a maban teng kong na zomto zel ding uh hi cih Norway ZNC-LA panin ZNC phungpi ah leh Pu Pum Za Kap Innkuanpih te tungah thu kong puak uh hi. 

Pasian, Gam leh Minam ading deihna itna nasepna leh thungetna  kiukhat pan,

ZNC-LA Norway tangin,

(Pu Pum Za Chin)                                                   (Pu Thang Khan Thawn)

Chairman                                                                    Secretary

ZNC – LA                                                                  ZNC-LA

Norway Branch                                                         Norway Branch

See More...

Sia Cin Lian Thang (lasa/ laphuak)

Zogam laphuak /lasa siam minthang Tedim gam huam Tuithang khua mi Pa Lengtong Pauno i naupa (laizom) Sia Cin Lian Thang (SiaThangno) in February 8 , 2011 (10:00AM) hun pawlin, azingvakna Yangon, Merchan St., and 44 Street kikal H.No. 26, a om a lawmit Sia Thawngboi (ZOMUS) makai omna innah thakhat in " Ka el na si ei" cih tawh tusuk leh asawt lo mahin Topa kiangah hong ciahsan hi.

Sia Thangno pen a kizakdan ah a ma hihtheih bangbangin Yangon ah Pasian nasem kipumpiak Pasian mizat leh a lungduai lungsim dik hithiat mahmah khat ahi hi. A mau Unau thum ahi  hong nusia sa Rev. Thawng Za Kim (Sia Thawngkim- Zolim Tui) , leh Lengtong Pauno cihte pen Zomi  ading Pasian hong zatsak Unau thupi leh mihamphate ahi uhi.  Tua banah a Unau thum mahin lasa siam bek hi loin, laphuak siamna letsong ngah vive ahi uh hi.

Gam leh minam leh khua le tui  it in, a hih theih zahzah in mapang nuam den Unaute uh cih kiza hi. Sia Thangno luanghawm pen February 10,2011 ni-in kivui ding a, hong nusia khin a Upiipa Sia Thawngkim inn , Yangon ah hunbawlna thupitak kinei cih kiza hi.

Sia Thangno in  " Momno Tongluang Album" thak liklek abawl khit lian, hawm khia nai lo deuhin hong nusia ahi hi.  A aw suah zong a Upa Lengtong Pauno aw mah sunin ngaihbang mahmah in mipi lungsim zo mahmah nam ahi hi. Mai lamah minam le Pasian a ding ngimna lianpi a neihte hong tangtung manlo suak ahih manin, minam ading mi pammaih khat akisumh ahi hi.

A nusiat a zi atate akipan a sanggam Lengtong Pauno te innkuan leh a dah akap Zomibup tawh kibangin International Tongsan Media Group pan dahpihna i puak hi. A zi a tate leh sanggam Ule naute khempeuh Topa Khasiang tho in na hehnem ta hen.!

Note: Sia Thangno Album Thak ngaihtheihna ding:  http://www.youtube.com/watch?v=6MbRd4CIaEg

Source by -  Tg. Lian Than Tuang

See More...

Pi Don Khen Niangh

Zomi Innpinu ( Zomi First Lady ), Pi Don Khen Niangh.

Pi Don Khen Niangh ( Kum 63) in April 23,2011 ( 2:30AM) hunin hong nusia cih thuza ka hih manun, World Zomi Congress in na angkawi Pu Chin Sian Thang ( President- ZNC) le innkuanpihte tungah dahpihna thu kong puak uh hi.

Zomi suahtakna le Zogam leitang ngah kikna ding lunggulhna tawh abeisa 1990 kum akipan Zomi National Congress (ZNC) min pua in Kawlgam galkapte' bawlsiatna le gawtna nuaiah lungkia loin nasem ahi Pu Chin Sian Thang taisan loin, gentheih haksatna tampi na thuakpihnate Zomi tangthu sungah amang ngei nawnlo dingin kiciamteh ahi hi.

Tua bek tham loin, Kawl kumpite in inn le lo sum le pai tawh hong zolzol mah ta leh tua hamphatnate sumh ngamin, Zomi tangpi tangtate' maban ding khualna tawh Committee Representing People's Parliament (CRPP), Mual mite kipawlna ahi United Nationalities Alliance (UNA)te hong piankhiatna le Zomi National Congress tuni ciang ahin zawhna pen Pi Niangh in na pasal Pu Chin Sian Thang a nungthuap in, na panpihnate hang ahih manin Zomi Innpinu ( Zomi Frist Lady) cih minphatna le zahtakna kong pia uh hi. Minam ading na pasal tawh nasepna sungah na nuntakna abei ni ciang dong na lungkham, na sinkhamnate Zosuan, Zotate in kong theihpih khaklohnate le kong huh zawhlohnate hangun dahna le maizumna tampi ka nei uh hi.

Zogam Innpinu aw, na it na pasal Pu Chin Sian Thang' maban le Kawl kumpite' gawtna tawh Thonginn sung a om na tapa Tg. Kam Lam Khupte World Zomi Congress (WZC) le Zosuante in na don/ na kem ding ka hih manun khamuang takin i Topa kiangah na tawlnga hithiat in! I maban om laite zong Pu Chin Sian Thang le Tg. Kam Lam Khup mah tawh lungkia loin na zomto suak ding hi ung' ci-in World Zomi Congress pan mangpha hongpaih kawmin hih Dahna laipi kong khak uh hi.

Suppreme Heaquaters,

World Zomi Congress

Kong it uh Pi Don Khen Niangh (Kum 63)

Leitung ah kum 63 sung nuntakna hun na zat khit ciangin April 23,2011 (2:30AM) hunin tawntung mun Kham khuapi hong ciahsan cih thu kaza uh a, leitungbup Nipi kalsim Zomi Thukizakna " International Tongsan Media Group " pan dahna liapi ka nei uh hi.

A diakdiak in na pasal Pu Chin Sian Thang (President- ZNC) in gam le lei a itna le akhualna tawh inn le lo hoih nei na pi'n teena ding anei lo bangin, thuman thutak nasem na pi'n thuman lo nasem bangin mawhsakna le kimat kihenna tamveipi a thuaknate sungah phun lo pau loin, na husanna abei ni ciang dong thuakpih/ puakpih in apanpih tawntung Zi hoih taktak na hihna hangin Zomi bup ading etteh huai " Zogam Nu Hoih " cih pahtawina le zahtakna kong piak kawmun " International Tongsan Media Group pan hih dahna laipi kong puak uh hi. 

Na nusiat na it mahmah Pu Chin Sian Thang@ Pu Thang le Thong sung a om laitak na tate akipan Zosuan laizom nih thumte in Zogam leitang ngah kik ma teng lungkia loin i maban na zom toto lai ding ka hih manun, na zalna Sian anglai pan thu hong ngetsak lai in maw Pi Niangh..! Thawhkik ni zingsang ciangin i Topa Pasian kiangah maitai tak i kimukik ding a, amah tawh i mangkhawm tawntung ding hi. Mel kimuh mateng mangpha man ni! Mangpha.! 

" ... Topa amuang mite a tha uh dim kik dinga, muvanlai bangin kha tawh leeng toin, amaute tai na pi'n tawl lo ding uh a, a maute lampai na pi-un gim lo ding uh hi ... " ( Isaiah. 40:31 )


Zogam le Zomi ading thukizakna kiu khat pan,

International Tongsan Media Group
Headquarters, 
Kawlpi, Zogam

See More...

Pu Tual Khaw Mang

Pu Tual Khaw Mang in June 7, 2011 ni in hong nusia a hih man in, pammaih sak na thu i pulak hihi.

Pu Tual Khaw Mang pen GAD ah Zomi sungah asang pen tung khat ahihbanah, Zogam, Shangam, Kachingam le kawlgam te'n Independence sualkhawm dinga kithukimna Panglong Agreement a Zomi kumpi Pu Pum Za Mang tang aa khutpi mek Pu Thawng Za Khup i tapa ahihi.

 Ama tangthu a thupi mahmah khat in Tukum Zomi Nam Ni  kibawlna ah, Panglong Agreeement a khutpi mek teng pahtawina kipiakna ah, apa Pu Thawng Za Khup tang aa, Independence Memorial Award ava lakngam pen, Zomi  Buerocrat zalian lui khat a dingin, hangsanna lianpi khat ahihi. Tukum Zomi Nam Ni pen Yangon NLD headquaters a kibawl hi in, mi a pai ngam ding kikhaat mahmah kawmkal ah, Zomi tang aa Award hong sa'n ngam giap pen i minam mahmah a ding zong angtang huai mahmah hi.

See More...

LZI pan dahpihna (Cope Topa pawi aa tuahsiatna)

November 26, 2010 ni in, Zogam Tonzang khuapi pan Tedim khuapi azuan, khualzin mi apua Chin-Taung-Than Bus mawtaw khat (a nei – Cinpu) tuahsia in Zomi laizom sanggamte mimal (17) in nuntakna beilawh uh a, aliam abai mimal (40) val pha hi. Hih mawtaw azui khualzin mi nuntakna abeilawh sanggamte leh aliam abai sanggamte atamzaw pen November 25~28, 2010 hun sung a Tedim khuapi ah a kibawl Cope Centennial Jubilee Pawipi asiim ding ahi uhhi.

Leitungbup Zomi Innkuan Kipawlna in hih tuahsiatna pen Zomi-te tangthu sung ah a mulkim huai pen, a khasiat huai pen, nuntakna tam a kibeilawh pen, aliam abai a tam pen tuahsiatna khat ahihbek thamlo in, Zomi buppi tawh kisai pawipi asiim dingin akuan laizom sanggamte tuahsiatna ahih manin Zomi-te nambup tuahsiatna (National Tragedy) khat in kisang hi.

Leitungbup Zomi Innkuan Kipawlna in hih nambup tuahsiatna panin nuntakna abeilawh laizom sanggamte hangin adah akap, khasia lungleng khuangai a om a innkuanpihte, a sanggam meeltheih tanaute, a khuapih tuipihte, a pawlpi mite tawh akibang in nakpi takin kidah mahmah a, na kisa mahmah hi.

Tuamah bangin, Leitungbup Zomi Innkuan Kipawlna in hih nambup tuahsiatna panin aliam abai laizom sanggamte thuaknate tawh akibang in lungsim kha sung ah kithuakpih a, liamna baina panin amanlang in damna leh lungsim pumpi thahatna angahkik zawhna dingun thupha kipuak hi.

Hih nambup tuahsiatna tawh kisai in Leitungbup Zomi Innkuan Kipawlna, Executive Council in December 11, 2010 ni abawl, leitung muntuam gamtuam a om Zomi Innkuan kipawlna Makaipite tawh thukikupna sung ah minam buppi dahna kahnate Anungta Pasian tung ah kithutuak takin kohna hun khat kizang hi.

Tuipi galkaai Zomi-te in nambup tuahsiatna panin nuntakna abeilawh laizom sanggamte galna ding leh aliam abai, adamlo laizom sanggamte vehna ding (panpihna) sum leh paaite, a munmun a om Zomi Innkuan kipawlna makaite tungtawn in Leitungbup Zomi Innkuan Kipawlna min tawh kaihkhop dingin kivaihawm hi.

Dahna sung pan itna tawh,

Executive Council

Leitungbup Zomi Innkuan Kipawlna

December 12, 2010. Tulsa, Oklahoma, U.S.A.

See More...