ZOMUS mission report

Gelna omsa bangin Zanni in ZOMUS (Zomi Music Uplift Society) Mission kipan hi. Biakinn alian deuh Zokam kizatnate ah ZOMUS ngimna leh tupna pulak kawmin lasakna tawh thuahding cih gelna om bangin Pasian in gualzawhna hongpia hi.

1. Tedim Baptist Church-Yangon (TBCY)

Zingsang nai 8 : 30 service kipan alap in kipai tek hi. ZOMUS mintawh apaite’n Zopuan silh uh hi. ZOMUS ngimna leh tupnate pulakna baan ah la dawng 3 kisa hi. TBCY biakinn buangding in mipi in khutbeeng zaizai hi.

Alungdamhuai mahmah leh alamdang mahmah thukhat ah ZOMUS makaite TBCY ah akikhop ni keekkeek in kum tampi ih ngaklah mahmah TBCY Biakinn lamna ding Permit, Brigadier of Yangon Command (Zangkong Taimuu) kiang’ panin kingahta ahih lam akipulak ni tawh kituak sese hi. TBCY President Pu Kap Khen Pau @ Kapno in tua Permit lai hong simkhiat khitciang in mipi khempeuh dingto in lungdamna khitui luangkawmsa in kumpite’ Kumpi topate’ Topa Asangpen Pasian’ tungah lungdamkohna kinei ziahziah in khuasikmul hongtho hi. Rangoon City Mayor (Myotaw wun) ii phalna ngahphet in akilam pah ziahziah ding hita hi. ZOMUS mintawh apaiteng in Pasian’ Min aphat ziahziah khitciang in Senior Pastor Rev Dr S Pau Khan En @ Sia Enno in sermon hongnei hi. “ZOMUS te hong paibaih le uh cin ahoih ding hiven (permit vai agenlua) ” ci hi. Christiante’ kahlei cial 4 cih thulu tawh hanthotna hongnei ahih manin ballpen puapeuhmah aciamtehlo omlo hi. ZOMUS in huntam lasim ahih manin hun manhak pian hi. Hun man ciangin Sia Enno in “Niangtui beek hawpkhawm ni” ci’n itna leh ngaihna tawh hongzawt hangin naitam satluata ahih manin utlai pipi in ka kikhen uh hi.

2. Evangelical Baptist Church (EBC)

TBYC pan upmawh sangin ki dingkhia hakzaw ahih manin na kipan khin tham uh hi. Tunphet in Senior Pastor Rev Gin Khen Mang @ Sia Khenpi in “Hong tungman hikei le uh cin hun man khitteh hongsam ning kacih hi in hong lap bilbel uh cin na hun uh lapah un. Thugen tom henla lasak kicing hen” ci’n hong ciamnuih hi. ZOMUS President Tg Pau Lun Min Thang @ Paulun in thugenna aneih khit ciangin Secretary Tg Suan Khan Lian @ Lianpi in zomto lai hi. La dawng 3 sakna leh thugenna tengtawh hun tampi bei phial taleh nuam kisa veve hi. Tedim pan mipil leh lasiam Sia Khawm Pau’ hongpai laitak tawh kituak aa hunzang ding ahih manin kilawp tek lel hi. Sia Khawm Pau in “Zopuan tawh fashion nonglah mawk uhpen hoihsa lua mahmah ing. En phapha ing. Adiakdiak in mopuan bang etlawm sa mahmah ing. Lawmnu’ kiang ah hoh kipan kikding kahiam kacih leh “Mawkmawk teknung guainung ah” hong cihsan” ci hi. “Tu’n ih puan te ih puah baan ah ih annek mahmah zong puahding hi hang. Tua lam tawh kisai pen Sia Khenpi tawh kikum le uh cin” ci hi. EBC pen ZOMUS ii innpi ahih manin nuam kisa mahmah tek lel hi.

3. Full Gospel Assembly of God (FGA)

Full biakinn pen suahtakna mun ahih manin tawldam mahmah hi. A music tumte lah siam lasate lah siam in iduang itaang teng hong zen mahmah hi. Zomi numei khatin keyboard tumzeel guitar tumzeel in ZOMUS makai teng in thangah phadiak hi. Haksatna aom sial aa ZOMUS ii taai detna Rev Dr Dam Suan Mung @ Sia Mungtawi hong om theihlo pen poi kisa mahmah hi. Ahizong in mi muanhuai tampi nei veve ahih lam ka mukhia uh hi. Sia Ngin Sian Kam in hun len in nuam mahmah hi. Shan gam ah missionary asem Sia Nang Siang Mang (?) in “Leipianma peka hongteel Pasian” cih bulphuh in hanthotna hongnei hi. Ama’ pianzia a experience ngiat tawh hong genkak ahih manin zaknop mahmah bek hikiau lo in tha kingah takpi hi. Shan gam ah shankam theilo pi aa Shan numei tawh akiteenna pan in atuahkhak haksatna, zumkong mangkong kitunna thute agen khit ciang in “Tuabang teng katuahna hangin Shan pau pen aneng atawng dong in thei ing. Sia Do Khup ii Ngaih Ang Lai Ah cihpen bang shan kam tawh kamphen in lak ing. Ka ngaih sutsut teh leipianma pek aa Pasian in Shante’ kiang ah gupna thu taangko dinga hong teel nahi mawk ” ci hi.

Atunga kagente alim mahmah tawh anuai aa suul nazui lecin kien thei ding hi.

http://picasaweb. google.com/ kaputhang/ZOMUSMission1#

Note: Thusapipa manlah lua ahih manin adawn suak ning. Pasian in lem asak nak leh mabante kizomto laiding aa asawt lo in Mandalay ah vapai ding zong geelna om hi.

Lungdam

Thangboi
Zangkong