Rev. Dr. J.H Cope leh Zomi te

Rev. Dr. J.H Cope leh Zomite – by Rev. Suan Khan Thang

Rev. Dr. Cope (Khup topa) in Zogam gospel hong puak lo hi leh Zomite bang i suak zen tam! Khup topa’ manphatna tampi lakah
tawmcik khat ka hong gelh hi.

Zomite anungta Pasian khat hong biakhawmsak hi : Kum 1900 A.D pawlin Khamtung (Chin Hills) ah a teeng Zomite, Dawi leh Kau lauin, singbul suangbul biain, beh tuam in biakna makai Tulpi tuam tek neiin, khua khat leh khat kidoin, kithatin, zu le sa tawh kidiah pikpek uh hi. Tua banga ganhing tawh a kilamdang lo aa nungta Zomite sungah Khup topate nupa in Pasian thu hong puakin, tuin a nungta Pasian khat hong biakhawmsak a, kihampha mahmah hi.

Zomite pau khat hong zangkhawmsak hi : Pu T. Suan Khen Mang in Ciimnuai Magazine 1994 sungah ‘Zolai Simbu Thu Pianzia’ cih thulu tawh kisai a gelh ka sim ciangin, Rev. Dr. J.H Cope in 1919 kumin Tedim gam leh Tonzang gam sunga Zomi pau tuamtuam a zangte a vekun ‘Tedim Pau’ a zatkhop dingin a bawlsak thu ka thei hi. Khup topa in i minambup zatkhop dingin Tedim pau hong bawlsak pen mi hampha i hi hi. Mikang paunak in, “I kigawmkhop leh khuasuak a, i tangpek leh kimuktuk” a cih bangin Zogam sunga Beh-pau leh Kai-paute hong gawmkhawmin, i vekpi a zatkhop dingin Zomite Pautaang(common language) dingin Tedim Pau hong bawlsak hi.

Zomite ading Zolai hong bawlsak hi : Khup topa hong khan main Pu Pau Cin Hau in ‘Zo Tuallai’ kici na mukhia-in, na zang man hi. Rev. Cope in mailam hun saupi a et ciangin Zomite, salam leh khalamah i khantoh nadingin Romte laimal (Roman Script) tawh Zolai hong bawlsak a, tuni ciang dong kizang suak a, kihampha mahmah hi. Zomi nam tuamtuamte Lai Siangtho ka et ciangin, Mizo Bible leh Tedim Bible zahin Laithekna (punctuation) a maan takin a zang niman dang a om nai kei hi. Tulaia a kigen henhan Tedim Labu zong lim takin vel lehang, hih Tedim Labu zahin la gual tawpna-a aw kihual (rhythm) hoih a nei Zomi nam dangte sungah om lo hi.

Zomite minam khat in hong gawm hi : Cope topa hong pai laiin Tedim khua leh Tedim gam sungah pau tuamtuam na om khin a, tua pau tuamtuam – Vaiphei, Dim, Hualngo, Zo, Thahdo, Thangkhal, Sihzang, Teizang, Khuano, Paite leh adangte samkhawmin tua tengin a zatkhop dingin Tedim pau tawh Lai Siangtho gelh in, Tedim Labu na bawlpih hi. Tua Tedim pau a zangkhawm teng ‘Tedim mi’ na suak uh hi. Bang hang hiam cih leh, Tedim pau pen kuate hiam ii pau neih tuam hi loin, Tedim khuapi sunga pau taumtuam a zangte sung pana hong piangtawm pau hi a, Tedim pauin na pau leh Tedim mi na hi ziau hi.

Tedim pau ki cici pen Zopau Tedim awsuah/ awkaih hi in, hih pau veve pen awsuah/ awkaih tampi a om ahihi. Gtn. English language pen British accent, American accent a om dan hi. Zo Language pen Tedim accent, Sihzaang accent, Teizaang accent ...