Cope Topa Zogam tun, kum (100) cin aa thuciam

(Centenary Jubilee Covenant)

Vanpi leipi abawl asiam, tung Pasian in Zomite hongpuah hongzuun dingin, tuma kum 100 lai 1910 kum in, Cope Topate nupa Tedim khuapi ah hongpuak hi.

Cope Topate hong tun kum 100 pawipi pan in, Zomite khangtangthu ah mailam kalsuan nadingin, Pasian hong huhna muangin, hih thute semding bawlding in Pasian mai ah ka kiciamhi.

Pasian hong piaksa Zogam nuampi leh, Zosuan tate tenna, giahna, luahna mun khempeuh Pasian ukna gam a suah theih nadingin, ki-itna, kilemna, thumaan diktatna, siangthona, cihtakna leh hanciamna tawh nungta ning ci-in Pasian tungah kakiciamhi.

Kum 100 cin pawi aa kipan, Jehovah Pasian pen, Zomi nambup Pasian hi-in Zo suan tate khempeuh zong Pasian minam hidingin Zominam bup Pasian tung ah ap in, AMAH tawh hihlai mun ah ka kiciam uhhi. Tung Pasian aw nang ma’ minam dingin tuni aa kipan Zomi nambup ong sangta in.

Pasian ong piaksa ka Zominam it-in, amanthan loh nading leh, aminsiat, amin dai loh nadingin, nungta ning ci-in, Pasian tung leh Zominam bup tung ah ka kiciamhi.

Pasian hongpiak etlawm Zogam leh ithuai Zominamte asiat, amuat, amuihloh nadingin, Zogam bup leh katen kagiahna, kakhawlna mun tengteng ah, guihtheih khamthieh zu leh bengte aa kipan adang guihtheih te khempeuh nelo, zanglo zuaklo, peilo dingin hih mun pan in Pasian tung ah kakiciamhi.

Zomite ong kikhenkham sakthei Biakna, Pawlpi, pau leh haam, tual lungsimte aa kipan, ki-el, kihuat theih nading thute khempeuh peel in, Zomi aa piang pumkhat asuah theih nadingin, ka hihtheih tawp in hanciamning ci-in, hihlai mun ah kakiciamhi.

Zominam leh Zo khang tangthu akipden nadingin akizang kipsa February kha (20) ni sim aa akibawl Zomi Namni ka omna munmun peuh ah, ka Zomipihte tawh ahizongin, Pawlpi kim in ahizongin, Pasian tung ah thungetna tawh, Zomibup kipumkhat aa, Thupha asaan theih nading un, Zomi namni phawkden, bawlden ning ci-in, hih lai mun ah ka kiciamhi.

Zomi namte minam picing asuah theih nadingin, Cope Topa ong patsaksa, Zolai itin, zangin, puahning zuun ning. Tuabangmah in, Zopau Zahaam Zoniik, Zopuan leh hong phungvuh thei Zongeina hoih khempeuh zong, zangin, keem in, puah in, zuun ning, ci-in hihlai mun ah ka kiciamhi.

Pasian hong piak Zogam nuampi meihalna leh manneilo aa singphukna tawh siatsuah lo-in, singkung lopa, nuntaakna nei ganhingte leh huih leh tuite cing in, keem in, puahning, zuun ning ci-in hih laimun ah ka kiciamhi.

Cope Topa leh sangmang dangte’n hong pantah in, tualsung Sia masate hanciamna tawh Lungdamna Thu kum 100 sung hong tualbual zota aa, Zomite pen Pasian Thupha ngah minam suakkhinta hi. Kum 100 cin pawikhen ah Lungdamna Thu a zanailo minamdangte tung ah puak in, Zomi vannuai Pasian zat minam asuahtheih nading in, Lungdam Thu puak Mission nasepna mimal kim leh Pawlpi kim in, kinpen leh sep pen in neinung ci-in Pasian mai ah hih lai mun pan ka kiciam uhhi.

HONGBAWL, HONGSIAM, TUNG PASIAN AW, HIH LAIMUN AH NANGMA TUNG AA KONG KICIAMNATE, ATAKSUAK ZAWH NADINGIN KEIMA’ LAM AH HONG PANG TA IN – AMEN.

Thupuak,
Hang Khan Lian